रत्नागिरी - गेल्या साडेचार वर्षात खासदारांनी एक रुपयांचा निधी उपलब्ध करुन दिलेला नाही. त्यामुळे निवडणुकीत खासदार विनायक राऊत यांना मदत करणार नाही. वेळप्रसंगी घटक पक्षाच्या उमेदवाराला मदत करु, असा इशारा भाजप कार्यकर्त्यांनी आमदार प्रसाद लाड यांच्या उपस्थितीत झालेल्या बैठकीत दिला.

सिंधुदुर्गपाठोपाठ रत्नागिरीत झालेल्या भाजप कार्यकर्त्यांच्या सभेमध्ये शिवसेनाविरोध सुर उमटले. युतीची भुमिका मांडण्यासाठी आमदार प्रसाद लाड, जिल्हाध्यक्ष बाळ माने, राजन तेली, प्रमोद जठार, सतिश शेवडे, अशोक मयेकर यांच्यासह कार्यकारिणीतील शेकडो सदस्य उपस्थित होते.

मागील निवडणुकीत भाजपने प्रामाणिक काम केले; परंतु पाच वर्षांमध्ये पंतप्रधानांपासून भाजपच्या नेत्यांवर शिवेसनेकडून टिका होत आहे. जाकिमिर्‍यासारख्या ग्रामपंचायतीत बाळ माने यांच्या वहिनी सरपंच होऊ नयेत यासाठी सदस्यांना आपलेसे करत शिवसेनेने त्यांना पराभूत केले. या परिस्थितीत दुखावलेली भाजपची मने पुन्हा कशी जुळतील, असा प्रश्‍न भाजप कार्यकर्त्यांनी उपस्थित केला.

रत्नागिरी-सिंधुदुर्ग लोकसभा मतदारसंघात मित्रपक्ष शिवसेनेचा उमेदवार नसला तरीही भाजपच्या घटकपक्षाचा उमेदवार रिंगणात आहे. वेळ पडल्यास आम्ही त्यांना मदत करु, अशी भावना कार्यकर्त्यांनी व्यक्त केली.

युतीबाबत पदाधिकारी आणि कार्यकर्त्यांमध्ये प्रचंड रोष आहे. खासदार विनायक राऊत आणि आमदार उदय सामंत यांनी दिलेल्या वागणुकीबाबतची आम्ही नाराज आहोत. मुख्यमंत्र्यांशी बोलून यापुढे ग्रामपंचायतीपासून जिल्हा परिषद, पंचायत समिती, पालिका आदीच्या सत्तेत भाजपला सामिल करण्याची हमी सेनेकडून घेऊ, असा शब्द मी देत आहे. युतीचा धर्म मात्र पाळावा लागले. 

- प्रसाद लाड, भाजप आमदार