रत्नागिरी : शहरामध्ये वाहतूक पोलिस आणि पालिकेकडून फक्त नो पार्किंगचे बोर्ड लावले आहेत. वाहनधारकांना वाहन कुठे पार्क करावे, असे पार्किंगचे बोर्ड क्वचितच आहेत. त्यामुळे वाहनधारकांची प्रचंड गैरसोय होते. त्यात सणासुदीच्या दिवसात तर वाहनांची मोठी गर्दी होते. गाड्या लावण्यास जागा मिळत नाही. त्यामुळे उलट-सुलट वाहने लावल्याने वाहतूक कोंडी होते. वाहनधारकांना वाहतूक पोलिसांच्या कारवाईचा सामना करावा लागतो.

पालिकेकडे पार्किंगसाठी अनेक प्लॉट आरक्षित आहेत. मात्र ते अद्याप विकसित केलेले नाहीत. लवकरच ही समस्या 
सुटणार आहे. शहरामध्ये वाहनधारकांची पार्किंगची समस्या सोडविण्याचा पालिकेने महत्त्वाचा निर्णय घेतला आहे. शहरातील मारुती मंदिर येथे पे ॲण्ड पार्क विकसित केले आहे. त्यापाठोपाठ आणखी ६ ठिकाणे पे ॲण्ड पार्क विकसित केले जाणार आहे. एप्रिलपासून शहरात एकूण ७ ठिकाणी ही सुविधा सुरू केली जाईल, अशी माहिती नगराध्यक्ष प्रदीप उर्फ बंड्या साळवी यांनी दिली. 

हेही वाचा - आंब्याच्या कोयांपासून होते तेलनिर्मिती ; कोकणचा ऋषिकेश करतोय संशोधन -

पालिकेने मारूती मंदिर येथे पे ॲण्ड पार्क विकसित केले आहे. त्या क्षेत्राचे उद्‌घाटन झाले. या व्यतिरिक्त प्रधान पोस्ट ऑफिस समोरच्या जागेत, साळवी स्टॉप येथे जलतरण तलावाजवळच्या मैदानात, आठवडा बाजार, लक्ष्मी चौक, पऱ्याची आळी, रामआळीतील सुपर मार्केटजवळ पे ॲण्ड पार्क विकसित केले जाणार आहे.

पालिकेतर्फे ही सुविधा उपलब्ध करून दिली जाणार आहे. दुचाकीसाठी ५ रुपये, तीन चाकीसाठी १० रुपये, कारसाठी २० रुपये, चारचाकी टेम्पोसाठी ४० रुपये आणि ट्रक, बससाठी १०० रुपये पार्किंगसाठी आकारले जाणार आहेत. हा आकार प्रति तीन तासांसाठी आहे. सध्या या सर्व जागांवर मोफत वाहने उभी केली जातात. ही वाहने अस्ताव्यस्त पार्किंग केलेली असतात. पे ॲण्ड पार्कमुळे वाहनधारकांना शिस्त लागणार आहे.

हेही वाचा - राजस्थानचा कुख्यात गुंड राहत होता कोल्हापूरच्या तरूणीसोबत लिव्ह इनमध्ये -

संपादन - स्नेहल कदम