रत्नागिरी : प्राथमिक शाळा सुरू करण्याबाबत शासनाने निर्णय घेतलेला नसला तरीही शाळा व्यवस्थापन समित्यांच्या सकारात्मकतेमधून काही गावांमध्ये जिल्हा परिषदेच्या शाळा सुरू करण्याच्या हालचालींना वेग आला. प्रशासनानेही लेखी आदेश नसले तरीही सध्या पालकांकडून संमतीपत्र गोळा करण्यात येत आहेत. 

कोरोनाची लाट ओसरल्यानंतर मागील शैक्षणिक सत्रापासून बंद ठेवलेल्या शाळा सुरू करण्यासाठी राज्य सरकारकडून प्रयत्न सुरू झाले. २३ नोव्हेंबरपासून नववी ते बारावीपर्यंतच्या शाळांना हिरवा कंदील मिळाला. रत्नागिरी जिल्ह्यातील ४५८ पैकी ३५८ शाळा सुरू झाल्या. एकूण ८३ हजार १३६ विद्यार्थ्यांपैकी २६ हजार जणं प्रत्यक्ष शाळेत येऊन शिक्षण घेत आहेत. यामध्ये ग्रामीण भागातील शाळांची संख्या सर्वाधिक असून शहरी भागात याला अत्यल्प प्रतिसाद मिळाला आहे.

हेही वाचा - जिल्हा परिषदेत पदाधिकारी बदलाच्या हालचाली वाढल्या ; पदांसाठी होणार रस्सीखेच -

पालक कोरोनाच्या भीतीने मुलांना शाळेत पाठवण्यास सकारात्मक नसल्याचे चित्र आहे. काही शाळांनी सोमवारपासून वर्ग भरण्याचे नियोजनही केले आहे. त्यासाठी सध्या पालकांकडून संमतीपत्र घेतली जात आहेत. राज्यात कुठेही प्राथमिक शाळा सुरू नाहीत; मात्र जिल्ह्यात शाळा सुरू होणार आहेत.

जिल्ह्यातील काही माध्यमिक शाळांमधील शिक्षक कोरोनाबाधित सापडले आहेत. सध्या जिल्ह्यात कोरोना रुग्ण सापडण्याचे प्रमाण कमी आहे. शनिवारी (ता. १९) ३० नवीन बाधित आढळल्याने चिंता वाढली आहे. अशीच स्थिती राहिली तर प्राथमिक शाळा सुरू करणे अडचणीचे ठरेल, अशी चर्चा आहे.

सुरू होणाऱ्या शाळांचे नियोजन

दरम्यान, सोमवारी (ता. २१) सुरू होणाऱ्या शाळांचे नियोजन झाले आहे. सोमवारी सकाळी १०.३० ते १२.३० पाचवी ते तिसरी, मंगळवारी पाचवी ते सातवी, बुधवारी पाचवी ते दुसरी, गुरूवारी पाचवी ते चौथी, शुक्रवारी पाचवी ते पहिली, शनिवारी सातवी ते सहावी सकाळी ८ ते १० असे नियोजन करण्यात आल्याची माहिती पुढे आली आहे.

हेही वाचा - १०८ नंबरची रुग्णवाहिकाच आहे आजारी ; ड्रायव्हर असूनही सेवा मात्र ठप्प -

वर्ग भरण्यासाठी पावले 

जिल्ह्यातील माध्यमिक शाळांची स्थिती गंभीर असतानाच जिल्हा परिषद प्राथमिक शाळांमधील वर्ग भरण्यासाठी पावले उचलली जात आहेत. जानेवारी महिन्यात ५ ते ८ वीपर्यंतच्या शाळा सुरू करण्यात येतील, अशी शक्‍यता आहे. परंतु तसे आदेश शासनाकडून आलेले नाहीत. तरीही रत्नागिरीत प्राथमिक शाळांचे वर्ग सुरू करण्यासाठी पावले उचलली जात आहेत. शिक्षण विभागाकडून लेखी आदेश नसले तरीही तशा तोंडी सूचना दिल्याचे पुढे येत आहे.

"ग्रामीण भागातील पालकांकडून शाळा सुरू करण्यासाठी विचारणा होत आहे; परंतु प्राथमिक शाळा सुरू करण्याच्या कोणत्याही लेखी सूचना दिलेल्या नाहीत."

- निशादेवी वाघमोडे, शिक्षणाधिकारी

संपादन - स्नेहल कदम