कणकवली : स्वातंत्र्यवीर सावरकर, लोकमान्य टिळक आदींसह बाळासाहेब ठाकरे या विभूती कुणाची खासगी मालमत्ता नाहीत. त्‍यांच्या स्मारकांचे दर्शन घेण्याचे स्वातंत्र्य सर्वांना आहे. पण खासदार विनायक राऊत (vinayak raut) यांनी बाळासाहेब ठाकरेंच्या (balasaheb thackeray) स्मारक स्थळाला भेट देण्याचा अधिकार केंद्रीय मंत्री नारायण राणे (narayan rane) यांना नाही, असे म्‍हणत कोत्‍या मनोवृत्तीचे दर्शन घडविले असल्‍याची टीका भाजपचे प्रदेश चिटणीस प्रमोद जठार यांनी केली.

जठार म्‍हणाले, महान विभूतींची स्मारके ही कुणाची खासगी मालमत्ता नाही. तर तो राष्‍ट्राचा जाज्‍वल्य वारसा आहे. जगभरातील अनेक मंडळी हा वारसा पाहण्यासाठी येत असतात. शिवसेना प्रमुख बाळासाहेब ठाकरे यांच्या स्मारकापर्यंत केंद्रीयमंत्री नारायण राणेंना जाऊ देणार नाही, असा इशारा खासदार विनायक राऊत यांनी दिला होता. पण राणे यांना शिवतीर्थावर जाण्यापासून कुणीही रोखू शकलं नाही.

ते म्‍हणाले, शिवसेनाप्रमुख (shivsena) बाळासाहेब ठाकरे हे सर्वांचे होते. राणे आणि त्‍यांच्यामध्ये मतभेद झाले असले तरी मनभेद कधीच नव्हते. राणेंनीही आज शिवतीर्थावर भेट देऊन बाळासाहेबांप्रती आदर आणि आपल्‍या नेकदिलाचे दर्शन घडवले. त्‍यामुळे संसदेत गेलेल्‍या खासदार राऊत यांनी आपल्‍या मनाचा कोतेपणा दाखवून बाळासाहेबांची उंची कमी करू नये. तर आपल्‍या खासदारकीचा महाराष्‍ट्राच्या विकासाला फायदा करून द्यावा. राजकारण हे जनतेचे लक्ष वेधून घेण्यासाठी नव्हे तर जनतेच्या विकासासाठी असावे हे राऊत यांनी लक्षात घ्यावे.