चिपळूण (रत्नागिरी) : येथे बनावट नोटांची हुबेहूब छपाई करून त्या मुंबई, ठाणे येथे वटविण्यासाठी गेलेल्या टोळीच्या म्होरक्‍याला ठाणे गुन्हे शाखा वागळे युनिट पाचने बेड्या ठोकल्या. त्याच्या चौकशीतून इतर दोन साथीदारांच्याही मुसक्‍या पोलिसांनी आवळल्या. या त्रिकुटाकडून ८५ लाख ४८ हजार रुपये किमतीच्या बनावट नोटा हस्तगत करण्यात आल्या. या आरोपींनी यापूर्वी बाजारात बनावट नोटा वटविल्याची शक्‍यता पोलिसांनी व्यक्त केली.

चिपळूण येथील कळंबट गावात राहणारा सचिन आगरे याने गावातच प्रिंटर, स्कॅनर आणि कॉम्प्युटरच्या मदतीने बनावट नोटा छापण्याचा गोरखधंदा थाटला होता. या ठिकाणी त्याने दोन हजार रुपये दराच्या बनावट नोटा छापल्या. या नोटा सचिन ठाण्यात वटविण्यासाठी येणार असल्याची माहिती ठाणे गुन्हे शाखा वागळे युनिट पाचचे वरिष्ठ पोलिस निरीक्षक विकास घोडके यांना मिळाली. त्यांनी गुन्हे शाखेचे पोलिस उपायुक्त लक्ष्मीकांत पाटील यांच्या मार्गदर्शनाखाली कापूरबावडी येथे सापळा रचला.

हेही वाचा- चपलांच्या दुकानाला आग: कापडाने घेतला पेट आणि बघता बघता सम्पूर्ण दुकान झाले खाक -

या ठिकाणी नोटा घेऊन आलेल्या सचिन याला पोलिस पथकाने बेड्या ठोकल्या. सचिनला अटक करताच त्याचे साथीदार मन्सूर 
खान व चंद्रकांत माने या दोघांनाही पोलिसांनी अटक केली. या तिघांकडून एकूण ८५ लाख ४८ हजार रुपये किमतीच्या बनावट नोटा जप्त करण्यात आल्या आहेत.सहायक पोलिस निरीक्षक प्रशांत पवार, अनिल सुरवसे, भूषण शिंदे, सहायक पोलिस उपनिरीक्षक बाबू चव्हाण, निवृत्ती महांगरे, देविदास जाधव, पोलिस हवालदार राजेश क्षत्रिय, विजयकुमार गोव्हे, मनोज पवार, शिवाजी रायसिंग, दिलीप शिंदे, शशिकांत नागपुरे, राजेंद्र गायकवाड, अजित शिंदे, कल्पना तावरे, सागर सुरळकर, यश यादव या टीमने कारवाई केली. 

कळंबट येथील सचिन आगरे यांच्या घराची तपासणी केली जाणार आहे. त्याने गावातील घरात नोटा छपाई केली असेल तर त्यासाठी वापरलेली यंत्रणा जप्त केली जाणार आहे. त्यासाठी आमची यंत्रणा कामाला लागली आहे. ठाणे पोलिसांच्या मदतीने आम्ही पुढील तपास करणार आहेत.
- भरत धुमाळ, पोलिस निरीक्षक, सावर्डे

संपादन- अर्चना बनगे