राजापूर: स्थानिक ग्रामस्थांचा विरोध असतानाही तालुक्यातील काजिर्डा येथील जामदा प्रकल्पाचे काम वेगाने सुरू आहे. स्थानिक ग्रामस्थांना विश्‍वासात न घेता सुरू असलेले धरणाचे काम, रखडलेले पुनर्वसन, प्रशासन आणि ठेकेदाराच्या मनमानी कारभाराच्या विरोधात आता काजिर्डा ग्रामस्थांनी दंड थोपटले असून रविवारपासून (ता. ६) प्रकल्पस्थळी Fasting छेडण्याचा निर्णय घेतला आहे.

काजिर्डाचे माजी सरपंच चंद्रकांत शिंदे, प्रदीप चंदुरकर, गणेश गुरव, मनोहर राणे आदी ग्रामस्थांनी जिल्हाधिकारी, पाटबंधारे विभागाचे कार्यकारी अभियंता, तहसीलदार व पोलिस ठाण्याला आंदोलनबाबत लेखी निवेदन देण्यात आले आहे.

तालुक्यातील काजिर्डा येथे जामदा प्रकल्पाच्या उभारणीची दोन दशकांपूर्वी मुहूर्तमेढ रोवण्यात आली आहे. मात्र, विविध कारणांमुळे हा प्रकल्प कायमच वादाच्या भोवऱ्‍यात सापडलेला आहे. विविध मागण्यांच्या अनुषंगाने प्रकल्पग्रस्तांनी या प्रकल्पाच्या उभारणीला विरोध केला होता. अनेकवेळा धरणाचे काम बंदही झाले होते. त्यानंतर या धरणाची निविदा राज्याच्या सिंचन घोटाळ्यामध्ये संशयाच्या भोवऱ्‍यात सापडली होती. त्यामध्ये शासनाच्यावतीने चौकशी होऊन काही धरणांच्या निविदा रद्द करण्यात आल्या होत्या. त्यामध्ये या धरणाच्याही निविदेचा समावेश असल्याचे सांगितले जाते. त्यामुळे प्रदीर्घ काळ धरणाचे काम थांबविण्यात आले. आता नव्याने कामाला सुरवात झाली आहे. या प्रकल्पाला ग्रामस्थांचा विरोध कायम आहे.

स्थानिक ग्रामस्थ वा ग्रामपंचायत यांना विश्‍वासात न घेता धरणाचे काम सुरू आहे. शासनाच्या नियमाप्रमाणे आधी ५० टक्के पुनर्वसन करायचे असूनही नियम धाब्यावर बसवून काम चालू केल्याचा आरोप ग्रामस्थांनी केला आहे. प्रकल्पग्रस्तांचे पुनर्वसन कुठे करणार, धरणग्रस्तांना कोणत्या सुविधा उपलब्ध करून देणार, पुनर्वसनाचा अद्यापही आराखडा तयार नाही. त्याबाबत धरणग्रस्तांमधून तीव्र संताप व्यक्त करताना त्या विरोधात ग्रामस्थ रविवारपासून (ता. ६) प्रकल्पस्थळी उपोषण करणार आहेत.