रत्नागिरी : शिवसेनेच्या उपनेतेपदी आमदार राजन साळवी यांची निवड झाल्यानंतर शिवसैनिकांमध्ये उत्साहाचे वातावरण होते. रत्नागिरीतील आठवडा बाजार येथील सर्वात जुन्या कार्यालयात शिवसैनिकांनी आमदार साळवींना शुभेच्छा देण्यासाठी गर्दी केली होती. तेथे नव्या-जुन्या कार्यकर्त्यांनी हजेरी लावत आनंदोत्सव साजरा केला. ढोल-ताशांच्या गजरामध्ये आमदार साळवींचे स्वागत करण्यात आले. कुणी पेढे वाटत होते, तर कुणी लाडू. प्रत्येकाचा चेहरा नवीन ऊर्जा मिळाल्याचे सांगत होता. साळवींच्या स्वागतानिमित्ताने शिवसैनिक एकवटलेला दिसला. बंडानंतरही पक्षाची ही ऊर्जा लक्षणीय होती.

नगरविकासमंत्री तथा शिवसेनेचे नेते एकनाथ शिंदे यांच्या बंडानंतर राजकीय वातावरण ढवळून निघाले आहे. त्याचा परिणाम सेनेच्या कोकणातील बालेकिल्ल्यात जाणवत आहे. उच्च व तंत्र शिक्षण मंत्री उदय सामंत, आमदार योगेश कदम हे मोहरे बंडाच्या बाजूने उभे राहिल्यामुळे जिल्ह्यातील शिवसैनिकांमध्ये अस्वस्थता होती. गेल्या पाच दिवसांमध्ये नेत्यांकडून कोणतेच आदेश न आल्यामुळे संभ्रमावस्था होती. त्यातून शिवसैनिकांना सावरण्यासाठी आमदार राजन साळवींना बळ देत उपनेतेपदाची जबाबदारी सोपवण्यात आली आहे. हे वृत्त दाखल झाल्यानंतर साळवींच्या समर्थकांसह सर्वच शिवसैनिकांनी जल्लोष साजरा केला.

तालुकाप्रमुख बंड्या साळवी, माजी शहर प्रमुख प्रमोद शेरे, उदय बने, रोशन फाळके, प्रमोद शेरे, आबा घोसाळे, प्रशांत साळुंखे, राहुल पंडित, संदीप सुर्वे, अविनाश कदम, नितीन तळेकर, राजन शेटये, बाळू साळवी, शेखर घोसाळे, विजय खेडेकर, महेश पत्की, किरण तोडणकर, अभय खेडेकर, राजू शिंदे, संतोष सावंत, प्रसाद सावंत यांच्यासह अनेक शिवसैनिक उपस्थित होते.

समाधानाचे वातावरण

राष्ट्रवादीमधून मंत्री सामंत यांच्याबरोबर आलेल्या कार्यकर्त्यांनीही आठवडा बाजारातील कार्यालयात हजेरी लावली होती. साळवींच्या निवडीबद्दल कार्यकर्त्यांमध्येही समाधानाचे वातावरण होते. बंडाच्या परिस्थितीत आमदार राजन साळवी ‘मातोश्री’ बरोबर राहिल्यामुळे एकनिष्ठेचे फळ मिळाल्याची चर्चा शिवसैनिकांमध्ये सुरु होती. मंत्री सामंतांच्या बंडामुळे रत्नागिरी विधानसभा मतदारसंघात शिवसैनिकांमधील संभ्रमाचे वातावरण दूर करण्याची जबाबदारी आमदार साळवींवर जबाबदारी दिली आहे.

निवडीचा आनंद साजरा

एकनिष्ठ आणि जुना शिवसैनिक म्हणून ओळख आहे. रत्नागिरीतील आठवडा बाजार हे शिवसेनेचे जुने संपर्क कार्यालय आहे. पूर्वी याच ठिकाणाहून रत्नागिरी विधानसभा मतदारसंघाचे कामकाज चालवले जात होते. निवडीचा आनंद साजरा करण्यासाठी शिवसैनिकांनी बुधवारी (ता. २८) हीच जागा निवडत सकाळपासूनच गर्दी केली होती. कार्यकर्ते शुभेच्छा देण्यासाठी कार्यालयात दाखल झाले. पेढे, लाडू वाटप करत होते.