रत्नागिरी : मुंबई-गोवा महामार्गावरील हातखंबा येथे कारमधून आलेल्या पुण्यातील दोघा संशयिताकडुन विनापरवाना रिव्हॉल्व्हर आणि ५ जिवंत राऊंड जप्त करण्यात आले आहेत. स्थानिक गुन्हे शाखा आणि ग्रामीण पोलिसांच्या पथकाने ही कारवाई केली. ग्रामीण पोलिस ठाण्यात संशयितांविरुद्ध गुन्हा दाखल करून त्यांना अटक केली. न्यायालयात हजर केले असता एक दिवसाची पोलिस कोठडी सुनावली.

प्रेम वर्मा अलकुंटे (वय २५) आणि सागर कुमार अलकुंटी (वय ३०,रा.शंकर साई मठ,हडपसर,पूणे) अशी अटक करण्यात आलेल्या दोन संशयितांची नावे आहेत. याबाबत स्थानिक गुन्हे अन्वेषण विभागाचे पोलिस हेड काँस्टेबल प्रवीण खांबे यांनी ग्रामीण पोलिसांकडे तक्रार दिली आहे. त्यानुसार, बुधवारी पहाटे हे दोघेही आपल्या ताब्यातील कारमधून (एमएच-४६-एएक्स-९४१२) हातखंबा येथील शांती ढाब्यासमोरुन जात होते.

रात्रीच्या गस्तीला असलेल्या स्थानिक गुन्हे शाखा आणि ग्रामीण पोलिसांच्या पथकाने संशयितांच्या गाडीची तपासणी केली. तेव्हा प्रेम अलकुंटे याच्याकडे विनापरवाना गावठी बनावटीचे पिस्तुल आणि ५ जिवंत राऊंड मिळून आले.

याप्रकरणी अधिक तपास सहाय्यक पोलिस निरीक्षक दिनकर सूर्य करत आहेत. कारमधून विनापरवाना जप्त केलेल्या रिव्हॉल्व्हरची किंमत ४८ हजार ५०० रुपयांचे आहे. आज पहाटे पावणे पाच वाजण्याच्या सुमारास ही कारवाई करण्यात आली. ग्रामीण पोलिस ठाण्यास संशयितांविरुद्ध गुन्हा दाखल करून अटक करण्यात आली.