रत्नागिरी : कोकणचा हापूस देशाच्या कानाकोपऱ्‍यात पोचवण्यासाठी कोकण रेल्वेने पुढाकार घेतला आहे. कोकण रेल्वे मार्गावर मॅँगो ट्रेन सोडण्यासाठी चाचपणी सुरू झाली असून, २९ नोव्हेंबरला आंबा बागायतदारांशी चर्चा केली जाणार आहे.

सिंधुदुर्ग, रत्नागिरीमधील हापूस आंब्याला मोठी बाजारपेठ मिळण्यासाठी कोकण रेल्वे कार्पोरेशनने स्पेशल मँगो ट्रेन सोडण्याची तयारी सुरू केली आहे. या माध्यमातून कोकणातील बागायतदारांना मुंबई, गुजरातसह देशाच्या कानाकोपऱ्‍यातील वेगवेगळ्या बाजारपेठांमध्ये हापूस पाठवणे शक्य होणार आहे. हा प्रवास सवलतीचा ठरू शकतो. कुडाळ, वेंगुर्लापासून रत्नागिरीतील बागायतदारांची बैठक घेण्यात येणार आहे.

संबंधित व्यावसायिक आणि बागायदारांशी चर्चा केली जाणार आहे. कोकणातील जिल्ह्यांत मोठ्या प्रमाणात आंब्याचे उत्पादन होते; परंतु आंबा नाशवंत असल्यामुळे तो वेळेत ग्राहकांपर्यंत पोहोचणे गरजेचे आहे. मात्र, वाहतुकीची योग्य सोय आणि स्वस्त सेवा नसल्यामुळे मोठ्या प्रमाणात आंबा खराब होतो. त्याची झळ बागायतदारांना सोसावी लागते. हे लक्षात आल्यामुळे कोकण रेल्वे प्रशासनाने हा निर्णय घेतला आहे. या उपक्रमांतर्गत मँगो स्पेशल ट्रेन सोडून येथील आंबा मुंबई व गुजरातसारख्या मोठ्या बाजारपेठेत पाठविण्यात येणार आहे. हा आंबा प्रवासात टिकावा यासाठी आवश्यक असलेली सोय या ट्रेनमध्ये करण्यात येणार आहे. यासाठी नेमके किती बागायतदार पुढे येतात, त्यांच्या काय समस्या अथवा मागण्या आहेत, याबाबत मते जाणून घेऊन पुढील निर्णय घेण्यात येणार आहे.