आंबोली - येथे यंदा 430 इंच इतका रेकॉर्ड ब्रेक पाऊस लागला आहे. गेल्या 25 वर्षातील हा उच्चांक आहे. इथली सरासरी 300 इंच आहे. जगात सर्वाधिक पाऊस चेरापुंजी येथे 400 इंचाच्या सरासरीने पडतो. आंबोलीने त्यालाही मागे टाकले आहे. 

आंबोलीच्या पावसाने यावर्षी विश्‍वविक्रम केला आहे. यावर्षी 430 इंच पावसाची नोंद आंबोलीत झाली आहे. 25 वर्षानंतर एवढा पाऊस प्रथमच आंबोलीत झाला आहे. महाराष्ट्रातील सर्वाधिक पावसाचे ठिकाणांपैकी एक म्हणून आंबोलीची ओळख आहे. देशातील चेरापुंजी हे प्रथम क्रमांकाचे ठिकाण. त्याचबरोबर मेघालयातील मौसिंराम येथे जगातील सर्वाधिक पाऊस पडतो. तेथे साधारण 400 इंचाची सरासरी असते. तेथे 8 महिने पाऊस पडतो; मात्र यावर्षी तेथे पाऊस कमी पडला आहे. चेरापुंजी येथे ही साधारण 7 ते 8 महिने पाऊस पडतो.

आंबोलीत मात्र यावर्षी पावसाने विक्रम केला आहे. यावर्षी पाऊस जगात सर्वाधिक कोकणातील आंबोलीत पडला आहे. 10750 मिलिमीटर एवढा पाऊस झाला आहे. 1994 पासून एवढी पावसाची नोंद प्रथमच आंबोलीत झाली आहे. 1980 च्या दशकात 400 इंचापर्यंत पावसाची नोंद व्हायची; मात्र पाऊस जूनपासून सुरू होऊन दसऱ्यापर्यंत पडायचा. यावर्षी जूनमध्ये 40 इंच पाऊस होता. जुलैचे 2 आठवडे पाऊस एकदम कमी होता; मात्र जुलैच्या शेवटच्या आठवड्यापासून पावसाने झोडपून काढले. ऑगस्टमध्ये पावसाने जोर मारून रेकॉर्ड केले. 17 इंच या सरासरीने 10 दिवस पाऊस झाला होता. 

अतिपावसाचा आंबोलीला फटकाही बसला. पावसामुळे घाट कोसळण्याबरोबर गंभीर परिस्थितीही निर्माण झाली होती. जनजीवनावर गंभीर परिणामही झाला होता. पडझडही झाली होती. वर्षा पर्यटनावर, हॉटेल व्यावसायिक, शेतकरी या सर्वांवर परिणाम झाला. आंबोलीत अनेक वर्षानंतर असा पाऊस झाला. पावसाने जागतिक विक्रम केला. 

यंदा सव्वाशे इंच जादा 

आंबोलीत साधारण 300 इंच ही सरासरी होती; मात्र सव्वाशे इंच पाऊस यावर्षी जास्त झाला आहे. यावर्षी जनावरांना हिरवा चारा अधिक काळ मिळणार आहे. दिवाळीही पावसात असल्याने यावर्षी हिरमोड झाला. पर्यटकांनी पाठ फिरवल्यामुळे शेतकरी, कामगारवर्ग, दूध उत्पादक, हॉटेल व्यावसायिक यांच्या अर्थकारणावर परिणाम झाला. यावर्षी आंबोलीत हॉटेल व्यवसायात पावसामुळे मंदीचे सावट दिसून आले. पाऊस, निवडणूक आणि आर्थिक मंदी यामुळे हॉटेल व्यवसाय मंद आहे.