रत्नागिरी : पवित्र पोर्टलवरून शिक्षकभरती करण्यावरील बंदी उठवण्यात आल्यामुळे रत्नागिरी जिल्ह्यात शिक्षक उपलब्ध होणार आहेत. जिल्हा परिषद शाळांसह हायस्कूल व कनिष्ठ महाविद्यालयांमध्ये शिक्षक उपलब्ध होण्याच्या आशा पल्लवित झाल्या असून विद्यार्थ्यांचे नुकसान आता टळेल.

रत्नागिरी, सिंधुदुर्ग जिल्ह्यात परजिल्ह्यातील शिक्षकांची संख्या मोठ्या प्रमाणात आहे. तीन वर्षे नोकरी करून ते आंतरजिल्हा बदलीने गावाकडे जातात. परिणामी शिक्षकांची वानवा निर्माण होते. यामध्ये विद्यार्थ्यांचे नुकसान होत आहे. या भरतीसाठी पवित्र पोर्टलचा पर्याय वापरण्यात आला; मात्र २०१७ पासूनची ही प्रक्रिया अद्याप पूर्ण झालेली नाही; परंतु यात जि. प. शाळा आणि हायस्कूलमधील विद्यार्थ्यांचे मात्र नुकसान होत आहे. ९ ऑगस्ट २०१९ ला एक निवड यादी प्रसिद्ध झाली; मात्र मुलाखतीद्वारे होणाऱ्या भरती प्रक्रियेची यादी अद्याप जाहीर झालेली नाही.

हेही वाचा - गणपतीपुळेत उभारणार आर्टिफिशिअल बंधारा ; प्रवाहाला बसणार आता ‘ब्रेक’ -

आरक्षणातील रिक्त जागा, विषय शिक्षकांच्या जागा व इतर रिक्त जागांसाठी भरती करण्याची प्रक्रिया सुरू असताना कोविड संकटाने भरती स्थगित झाली. आता कक्ष अधिकारी कविता तोंडे यांच्या ७ डिसेंबरच्या पत्रान्वये पवित्र प्रणालीवरील बंदी उठविल्याचे स्पष्ट झाले आहे. त्यामुळे पुन्हा एकदा भावी शिक्षकांमध्ये आनंदाचे वातावरण पसरले आहे. सिंधुदुर्ग, रत्नागिरी जिल्ह्यात कोणत्याही प्रकारचा बिंदुनामावली घोटाळा नाही.

राज्यातील इतर ठिकाणी घोटाळा असल्यामुळे खुल्या प्रवर्गातील जागा अतिरिक्त ठरत आहेत, त्या शिक्षकांचे समायोजन जिल्ह्यात करू नये. नवीन उमेदवारांनाच संधी द्यावी, अशी मागणी जिल्ह्यातील स्थानिकांतून होत आहे. मागासवर्गीय उमेदवारांची ५० टक्के पदे कपात केल्यामुळे सिंधुदुर्ग, रत्नागिरीतील सातशे ते आठशे पदे अद्याप रिक्त आहेत. या पदांवर अतिरिक्त शिक्षकांचे समायोजन न करता ती पदे पवित्र पोर्टलमार्फत भरावीत, अशी मागणी होत आहे.

हेही वाचा -  पैशाची व मोबाईलची मागणी करत ट्रक चालकावर चाकूने केला हल्ला -

संपादन - स्नेहल कदम