विजेच्या लपंडावामुळे भुईबावडावासीय हैराण
१५ दिवसांपासूनची स्थितीः महावितरणने सुधारणा न केल्यास आंदोलनाचा इशारा
सकाळ वृत्तसेवा
वैभववाडी, ता. ७ः भुईबावडा पंचक्रोशीतील विजपुरवठा गेल्या पंधरा दिवसांपासून विस्कळीत असून विजेच्या लपंडावामुळे नागरिक हैराण झाले आहे. महावितरण कंपनीने यात सुधारणा केली नाही तर आंदोलन छेडण्यात येईल, असा इशारा या भागातील ग्रामस्थांनी दिला.
तालुक्यात पंधरा दिवसांपूर्वी मान्सूनपुर्व पाऊस झाला. या पावसापासून भुईबावाडा पंचक्रोशीतील मांगवली, आखवणे भोम पुनर्वसन, तिरवडे, ऐनारी, हेत, आखवणे, भोम, मोंदे, उपळे परिसरात दिवसभर सतत वीज पुरवठा खंडित होत आहे. यामुळे घरातील टी.व्ही., फ्रिज, कॉम्पुटर, लॅपटॉपसारखी उपकरणे नादुरुस्त होत आहेत. अनेकवेळा वीज पुरवठा खंडित होत असल्यामुळे पाणी पुरवठा करणाऱ्या नळ योजनावर त्याचा परिणाम होत असून नागरिकांना पाणी टंचाईचा सामना करावा लागत आहे. त्याचप्रमाणे भुईबावडा येथे बँक, दवाखाना व शासकीय कामासाठी येणाऱ्या पंचक्रोशीतील नागरिकांना वीज पुरवठा सतत खंडित होत असल्यामुळे कामासाठी तासनतास ताटकळतं राहावे लागत आहे. याबाबत नागरिकांकडून वीज वितरण कंपनीच्या अधिकाऱ्यांशी संपर्क साधूनही वीज वितरणच्या कारभारात सुधारणा होताना दिसत नाही. येत्या दोन-तीन दिवसांत जर महावितरणने सुधारणा केली नाही तर ग्रामस्थ आंदोलन छेडतील, असा इशारा ग्रामस्थांनी महावितरणला दिला आहे.

चौकट
महावितरणकडुन दुर्लक्ष
वीज वितरण कंपनीकडून पावसाळ्यापूर्वी वीज वाहिन्यावरील झाडे तोडणे, खराब वीज वाहिन्या, वीजखांब बदलणे गरजेचे आहे. अनेक ठिकाणी वीज वाहिन्या व वीज खांबावर झाडी आलेली आहेत तर अनेक ठिकाणी वीज खांब खराब झालेले आहेत. याकडे महावितरणकडुन दुर्लक्ष केले गेल्यानेच भुईबावडा परिसरातील विज पुरवठा सुरळीत नसल्याचा आरोप देखील नागरिकांकडुन केला जात आहे.