88967

कनेडी पंचक्रोशीत भातपेरणी

दमदार पावसाचा आधार ः यांत्रिकी शेतीवर भर

सकाळ वृत्तसेवा
कनेडी, ता. ९ ः परिसरात दमदार पाऊस झाल्याने खरीप हंगामातील भातपेरणीला सुरवात झाली आहे. शेतकरी संकरित आणि सुधारित भाताचे बियाणे पेरणी करीत आहेत. एकूणच, दमदार पावसामुळे बळीराजा सुखावला असून पेरणीसाठी शेतशिवारं गजबजल्याचे दिसते.
गेल्या काही वर्षांपासून यांत्रिक शेतीवर भर देण्यात येत आहे. त्यामुळे पॉवर टिलरचा वापर नांगरणीसाठी होत असल्याचे दिसते. भाताचे वाफे मशागत करून तयार करण्यात आले आहेत. पावसाने यंदा उशिरा हजेरी लावली. तेव्हा दोन दिवसांपासून भातपेरणी सुरू झाली आहे. वीस दिवसांनंतर रोप काढणासाठी तयार होणार आहेत. दोन दिवस सतत पाऊस कोसळत असल्याने शेतशिवारात पाणी साचले आहे. त्यामुळे भातपेरणीची कामे रखडली होती. मात्र, आता वरुणराजाने साथ दिल्यामुळे शेतकरी कामाला लागल्याने शेतशिवारे गजबजली आहेत.