रत्नागिरी : पहाटेच्या सुमारास वाहणाऱ्या मतलई वाऱ्यांनी मच्छीमारांचे गणित बिघडले आहे. वेगवान वाऱ्यांमुळे समुद्रात पाण्याला करंट असून मासळीचा रिपोर्टच मिळत नाही. परिणामी काही मच्छीमारी नौकांनी बंदरातच उभे राहणे पसंत केले आहे. दहा वावात मासेमारी करणाऱ्या गिलनेटवाल्यांना जेलीफिश, डॉल्फिनच्या त्रासाला सामोरे जावे लागत आहे. त्यामुळे मासळीचे दर वधारले आहेत.

यंदा मासेमारी हंगाम सुरू झाल्यानंतर ऑक्‍टोबरपर्यंत बदलत्या वातावरणाला सामोरे जावे लागत आहे. नोव्हेंबर महिना मच्छीमारांसाठी चांगला जाणार, अशी आशा होती. मासळी कमी मिळत असली तरीही दर बरे होते; मात्र अखेरच्या टप्प्यात मतलई वाऱ्यांनी मासेमारीत अडथळा आणला आहे. शनिवारपासून मतलई वारे सुरू झाले आहेत. 

हेही वाचा -  फक्त पाच वर्षेच काय, पुढची पंचवीस वर्षे उद्धव ठाकरेच महाराष्ट्राचे मुख्यमंत्री -

पहाटेच्या सुमारास वारे वाहत असल्याने दुपारपर्यंत पाणी अस्थिर राहते. खोल समुद्रात मासेमारीसाठी गेलेल्या अनेकांना मासळीच मिळालेली नाही. काही मच्छीमारांनी नौका बंदरातच उभ्या केल्या आहेत. चांगला दर देणारे पापलेट, सरंगा, सुरमई यांच्या किमतीत वाढ झाली आहे. गार वारे पाण्याला असलेला करंट यामुळे परिणाम झाल्याची शक्‍यत आहे. त्यापूर्वी मांदेली, छोटा बांगडी सापडत असून त्याचे दर अधिक आहेत. बांगड्याचा दर १०० रुपये किलोवरून १५० ते २०० रुपयांपर्यत 
वधारलेला आहे.

गिलनेटद्वारे मासेमारी करणाऱ्यांना मतलई वाऱ्यांचा फटका बसला आहे. या वाऱ्यांमुळे जेलीफिश, डॉल्फिन किनाऱ्याकडे वळतात. या दोन्ही माशांमुळे जाळी फाटतात आणि नुकसान होते. जाळ्यात सापडलेली मासळीही हे मासे खातात. झुंडीच्या झुंडीने डॉल्फिन किनाऱ्यावर फिरत आहेत. दोन्ही मासे गारव्याला किनाऱ्याकडे येतात. त्याचा फटका अनेक मच्छीमारांना बसला आहे.

"दहा वावात मासेमारी करणाऱ्यांना मासळी मिळत नाही. अनेकजण डॉल्फिन, जेलीफिशच्या भीतीने समुद्रात जात नाहीत."

- श्रीदत्त भुते, मच्छीमार

हेही वाचा - बहिणीचा आशीर्वाद पाठीशी म्हणून वाचला भावाचा जीव -

संपादन - स्नेहल कदम