गुहागर (रत्नागिरी) : ‘विकास हवा तर चेहरा नवा’ ही गावपॅनेलची घोषणा इतकी लोकप्रिय झाली की, तळवलीत प्रस्थापितांच्या पॅनेलला तीन उमेदवारच मिळालेले नाहीत. गावपॅनेलचे प्रभाग २ मध्ये सर्वसाधारण स्त्री प्रवर्गाचे २ उमेदवार बिनविरोध निवडून आलेत. प्रस्थापित म्हणजेच विनायक मुळे समर्थक गटाला हा धक्का आहे. आता गाव पॅनेलने कंबर कसली आहे.

गुहागर तालुक्‍यातील तळवली ग्रामपंचायतमध्ये १५ वर्षे विनायक मुळे समर्थक गटाची सत्ता होती. तालुक्‍याच्या राजकारणात मुळे पडद्याआड मोठी भूमिका निभावत असतात. तळवली ग्रामपंचायतीच्या प्रभाग १ मध्ये २ जागा सर्वसाधारण प्रवर्गासाठी व १ जागा सर्वसाधारण स्त्री प्रवर्गासाठी आरक्षित आहे. या प्रभागातून विनायक मुळे स्वत: निवडणुकीच्या रिंगणात आहेत; मात्र त्यांना आणखी एक सर्वसाधारण प्रवर्गातील उमेदवार मिळालेला नाही. या ठिकाणी आता सर्वसाधारण प्रवर्गातील दोन जागांसाठी तिरंगी लढत होणार आहे. हे दोन्ही उमेदवार गावपॅनेलचे निवडून येण्यासाठी जोरदार प्रयत्न सुरू आहेत.

हेही वाचा - साळगावकरांना राजकीय नैराश्‍य ः तेली -

प्रभाग २ मधून नागरिकांचा मागास प्रवर्गाचा १ आणि सर्वसाधारण स्त्री प्रवर्गाचे २ उमेदवार निवडून आणायचे आहेत. येथे मुळे समर्थक गटाला स्त्री उमेदवारच न मिळाल्याने गाव पॅनेलच्या दोन्ही स्त्री उमेदवार निवडून आल्या. प्रभाग ३ मध्ये गाव पॅनेल विरुद्ध मुळे समर्थक गट अशी थेट लढत होणार आहे. गावातील एकूण वातावरण गाव पॅनेलच्या बाजूने आहे. येथे शिवसेना विरुद्ध गाव पॅनेल अशी निवडणूक भासविण्याचा प्रयत्न झाला.

माणसांची खडान्‌खडा माहिती

मुळेंना गावातील प्रत्येक वाडीची, माणसांची खडान्‌खडा माहिती आहे. गेली १५ वर्षे आमदार भास्कर जाधव यांचे जवळचे, विश्वासू सहकारी म्हणून काम केलेले असल्याने डावपेच उलटवण्याची कलाही त्यांच्याकडे आहे. सर्वस्व पणाला लावून निवडणुकीनंतरही ते ग्रामपंचायत आपल्या ताब्यात ठेवू शकतात. हे गाव पॅनेलच्या मंडळींना माहिती आहे. त्यामुळेच संपूर्ण बहुमताची रणनीती आखली जात आहे.

हेही वाचा - रात्री उशीरा या तरुणाचा कचरा टाकण्यावरुन निर्घृण खून करण्यात आला

एकाच गटाकडे १५ वर्षे सत्ता; विरोधात लाट 

५ वर्षे जिल्हा परिषद सदस्य असलेल्या विभावरी मुळे सध्या पंचायत समिती सभापती आहेत. त्यापूर्वी त्याच तळवली ग्रामपंचायतीच्या सरपंचही होत्या. एकाच गटाकडे १५ वर्षे सत्ता राहिल्याने या गटाविरोधात लाट तयार झाली आहे. मुळे समर्थक गटाला प्रस्थापित ठरवून निवडणूक लढवली जात आहे. गावातील सर्व समाज आणि सर्व पक्षांनी एकत्र येऊन गाव पॅनेल तयार केले.

संपादन - स्नेहल कदम