मालवण (सिंधुदुर्ग) :  सर्जेकोट येथे समुद्रात छोटी मच्छिमार बोट उलटून दुर्घटना घडली. यात बुडालेल्या मच्छिमारांना वाचवण्यासाठी गेलेली दुसरी बोटही बुडाली. या दोन्ही दुर्घटनांमध्ये बुडालेल्या आठपैकी सात जणांना वाचवण्यात यश आले. एकजण बेपत्ता आहे. 

सध्या समुद्रात लाटांचा जोर वाढला आहे. आज सकाळी साडेसातच्या दरम्यान रमेश देऊलकर (वय 26), केशव कोंडबा (वय 24), परेश कोंडबा (वय 28), यशवंत देऊलकर (वय 30) हे छोटी नौका घेवून सर्जेकोट बंदराजवळील समुद्रात मासेमारीला गेले होते. लाटांच्या मार्‍यामुळे ही नौका उलटून मच्छीमार बुडू लागले. हा प्रकार लक्षात आल्यानंतर राजू देऊलकर (वय 26), दिवाकर देऊलकर (वय 28), रजनिकांत देऊलकर (वय 24), प्रसाद आडकर (वय 28) हे दुसरी छोटी नौका (पात) घेवून समुद्रात उतरले; पण ही नौकाही समुद्राच्या लांटांमध्ये उलटली. वाचवायला गेलेले मच्छीमारही बुडू लागले. 

हेही वाचा- सांगलीतून कुडाळला आला पोलिस कर्मचारी आणि..-

उपलब्ध माहितीनुसार आठ पैकी सात मच्छिमारांना किनार्‍यांवर आणण्यात यश आले. दिवाकर देऊलकर हे अद्याप सापडले नाही. बचाव पथक त्यांचा शोध घेत आहे.

संपादन - अर्चना बनगे