मंडणगड : मंडणगड तालुक्यातील वेळास व साखरी दरम्यान समुद्र किनारी लाटांवर कचऱ्यासोबत एक अज्ञात पुरुषाचा मृतदेह वाहून आला आहे. आज(ता.23) दुपारी २ वाजता हा प्रकार घडला. या घटनेची माहिती मिळताच पोलिस घटनास्थळावर दाखल झाले. ''घटनास्थळाची पाहणी करीत पंचनामा केला करुन मृतदेह पोस्टमार्टेम करण्यासाठी मंडणगड येथे पाठवण्यात आला आहे''अशी माहितील बाणकोट सागरी पोलिस ठाण्याचे पोलीस निरीक्षक उत्तम पीठे यांनी दिली आहे

समुद्रकिनारी साधारण ४ ते ५ किमी चालत जीवरक्षक यांना मदतीला घेत पोलीस घटनास्थळी गेले. त्याठिकाणी समुद्रातील कचऱ्यासोबत एक पुरुषाचा मृतदेह आढळून आला. अंगावर एकही कपडा नसलेले हे शरीर पाण्यात फुगलेल्या अवस्थेत दिसत होते.

पंचनाम्यासकट सर्व कागदपत्रे पूर्ण केल्यानंतर अकस्मात मृत्यू रजिस्टर क्रमांक 6 / 21 कलम 174 CRPC दाखल करण्यात आले आहे. सदर पुरुषाचे वय हे २० ते २५ वर्षा दरम्यान असल्याचा प्राथमिक अंदाज आहे. याबाबत माहिती मिळताच संबंधित नातेवाईक यांनी बाणकोट पोलीस ठाण्याशी संपर्क करण्याचे आवाहन उत्तम पीठे यांनी केले आहे.