शेतकरी बंदूक परवान्याबाबत
गवस यांचे मुख्यमंत्र्यांना निवेदन
दोडामार्ग, ता. ८ ः जिल्ह्यातील शेतकऱ्यांचे वन्य प्राणी नुकसान करत असल्याने शेतकऱ्यांना बंदूक परवाना मिळावा, अशी मागणी बाळासाहेबांची शिवसेना तालुकाप्रमुख गणेश प्रसाद गवस यांनी मुख्यमंत्री एकनाथ शिंदे यांच्याकडे निवेदनाद्वारे केली आहे. निवेदनात म्हटले आहे की, जिल्ह्यामध्ये मोठ्या प्रमाणात सुपारी, नारळ, केळी, बांबू, भातशेती व अन्य बागायती पिके घेतली जातात. गेल्या काही वर्षांपासून जंगली प्राण्यांकडून पिकांची मोठ्या प्रमाणात नासाडी होत आहे. माकड, डुक्कर, हत्ती या प्राण्यांपासून जीवित हानी देखील होत आहे. शेतकऱ्यांच्या उदरनिर्वाहाचे साधन असलेली शेती प्राणी नष्ट करत आहेत. त्यामुळे शेतकऱ्यांवर उपासमारीची वेळ येऊन ठेपली आहे. या वन्य प्राण्यांना शेतातून हाकलून लावण्यासाठी व स्वतःच्या संरक्षणासाठी शेतकरी बंदूक परवाना देण्याबाबतचे आदेश जिल्हाधिकारी यांना द्यावेत, अशी मागणी बाळासाहेबांची शिवसेना तालुकाप्रमुख गवस यांनी केली आहे.