rat25p24.jpg
85285
खेडः बोरघर नातूनगर नजीकचा महामार्गावरील धोकादायक जोडपट्टा.
------------
नातूनगर हद्दीवरील
डांबरी जोडपट्टा जीवघेणा
खेड, ता. २५ः मुंबई-गोवा महामार्गावरील बोरघर नातूनगर हद्दीवरील मोरीवर काँक्रिट पट्ट्यांना जोडण्यासाठी दोन्ही बाजूला डांबरी जोडपट्टा मारण्यात आला आहे. मारलेला जोडपट्टा उंच झाला आहे. वेगाने येणाऱ्या वाहनचालकांना याचा अंदाज येत नसल्याने त्या ठिकाणी वाहने उंच उडतात. त्यामुळे चालकाचे स्टेअरिंगवर नियंत्रण राहत नसल्याने वाहने अचानक वेडीवाकडी वळतात व दुभाजकावर किंवा साईडच्या संरक्षक कठड्यावर आदळतात व मोठे अपघात होत आहेत.
या पट्ट्याचा वाहनचालकांना, प्रवाशांना त्याचबरोबर रस्त्याने चालणाऱ्या नागरिकांच्या जीवाला धोका आहे. शुक्रवारी (ता. २४) मोटारीचा अपघात याच कारणाने झाला. तसेच केवळ बोरघर स्टॉपवरच क्रॉसिंग ठेवल्याने आणि सर्व्हिस रोड नसल्याने नातूनगर ते बोरघर त्याचबरोबर चिंचवली फाटादरम्यान वाहनचालक वाहने उलट्या मार्गाने हाकत आहेत. हा प्रकार अत्यंत धोकादायक आहे. त्यामुळे या दरम्यान सर्व्हिस रोड त्वरित बनवण्यात यावा, अशी मागणी नागरिकांची आहे. संबंधित खात्याने याची दखल न घेतल्यास बोरघर, नातूनगर व चिंचवली येथील नागरिकांसोबत भाजपा सरचिटणीस व बोरघरचे माजी सरपंच उदय बोरकर, चिंचवलीचे माजी उपसरपंच अनंत कांदेकर, बोरघरचे शिवसेना शाखाप्रमुख किशोर बोरकर, बोरघरच्या सरपंच धारा बोरकर, उपसरपंच प्रिया पवार, बहुसंख्य सर्वपक्षीय कार्यकर्त्यांनी रास्ता रोको अंदोलन करण्याचा इशारा दिला आहे.