87529
दोडामार्ग ः मासे विक्रीसाठी निवारा म्हणून उभारलेली झोपडी आगीत जळून खाक झाली.

मासे विक्रीसाठी उभारलेल्या
झोपडीला दोडामार्गात आग

एका संशयिताला पोलिसांकडून अटक

सकाळ वृत्तसेवा
दोडामार्ग, ता. ७ ः मासे विक्री करण्यासाठी तात्पुरत्या स्वरुपात उभारलेल्या झोपडीला आग लावून जाळल्याची तक्रार फिर्यादी दर्शना दशरथ जाधव यांनी संशयित संतोष बोडेकर यांच्याविरुद्ध दोडामार्ग पोलिस ठाण्यात दिली. त्यानुसार संशयितावर गुन्हा दाखल करून अटक करण्यात आल्याची माहिती पोलिस ठाण्यातून देण्यात आली.
या प्रकरणी दोडामार्ग पोलिस ठाण्यात गवस यांनी दिलेल्या तक्रारीनुसार, वझरे येथील दर्शना जाधव यांचा दोडामार्ग शहरात मासे विक्रीचा व्यवसाय आहे. मच्छी विक्रीसाठी बाजारपेठेत निवाऱ्यासाठी झोपडी उभारून त्यांनी आपला व्यवसाय थाटला आहे. आठवड्यातून सोमवार व गुरुवार या दोन दिवशी त्यांचे मासे विक्रीचे दुकान बंद असते. त्यानुसार काल (ता. ६) दुकान बंद होते. रात्री ९.३० वाजण्याच्या सुमारास त्यांच्या दुकानाला आग लागली. ही आग संतोष बोडेकर या युवकाने लावल्याचा त्यांचा संशय आहे. त्यांनी पतीसमवेत घटनास्थळी धाव घेतली. दुकानाकडे पोहोचेपर्यंत आतील सामान जळाले होते. यात त्यांचे मोठे नुकसान झाले. याबाबत जाधव यांनी येथील पोलिस ठाण्यात धाव घेत फिर्याद दिली. त्यांनी दिलेल्या तक्रारीनुसार बोडेकर याच्यावर गुन्हा दाखल करून त्याला अटक करण्यात आली. आग लावण्यामागचे कारण अद्याप स्पष्ट झाले नसल्याचे पोलिसांनी सांगितले.
.................