89313
प्राचार्य डॉ. सुरेंद्र पारकर

आयुर्वेद महाविद्यालयाचे पहिले
प्राचार्य सुरेंद्र पारकरांचे निधन
सावंतवाडी, ता. १५ ः येथील राणी जानकीबाई वैद्यकीय संस्था संचलित भाईसाहेब सावंत आयुर्वेद महाविद्यालयाचे प्रथम प्राचार्य व मुंबई विद्यापीठाच्या आयुर्वेद विद्याशाखेचे माजी अधिष्ठाता डॉ. सुरेंद्र पारकर यांचे आज त्यांच्या मुंबई येथील निवासस्थानी निधन झाले.
डॉ. पारकर हे ६ ऑगस्ट १९८४ ते ३१ जानेवारी २००१ पर्यंत सावंतवाडीतील आयुर्वेद महाविद्यालयात प्राचार्य तथा प्राध्यापक (द्रव्यगुण विज्ञान) पदावर कार्यरत होते. त्यांनी लायन्स क्लब सावंतवाडीचे सदस्य, सेक्रेटरी, खजिनदार व अध्यक्ष म्हणूनही कार्य केले. या पदांच्या माध्यमातून त्यांनी जिल्ह्यात अनेक समाजोपयोगी उपक्रम राबविले. त्या काळात अनेक आरोग्य शिबिरांचे आयोजन केले. आयुर्वेद कॉलेज आणि हॉस्पिटलमध्ये त्यांच्या योगदानाने अनेक रुग्णांना लाभ झाला होता. त्यांच्या शिस्तीमुळे व मेहनतीमुळे महाविद्यालयाचा निकाल १०० टक्के लागत होता. उत्कृष्ट प्रशासकीय कौशल्य, दर्जेदार वक्ते, विद्यार्थी प्रिय व्यक्ती म्हणून त्यांची ख्याती होती. डॉ. पारकर यांच्या निधनाने घरकुलातील शिरिष कायमचा हरपला आहे, अशा शब्दांत भाईसाहेब सावंत आयुर्वेद महाविद्यालय परिवारातर्फे त्यांना आदरांजली वाहण्यात आली. त्यांच्या पश्चात पत्नी, दोन मुलगे, सुना, नातवंडे असा परिवार आहे.
--
89322
आप्पा कदम यांचे निधन
देवगड, ता. १५ : दाभोळे-बौद्धवाडी (ता.देवगड) येथील रहिवाशी आप्पा जानू कदम (वय ८८) यांचे निधन झाले. येथील तहसीलदार कार्यालयातील महसूल सहाय्यक प्रदीप कदम यांचे ते वडील, तर दाभोळे पोलिसपाटील सानिका कदम यांचे सासरे होत.