संक्षिप्त

अर्ज नूतनीकरणास
३१ पर्यंत मुदतवाढ
सिंधुदुर्गनगरी ः भारत सरकार शिष्यवृत्तीसाठी २०२२-२३ करिता महाविद्यालयातील ज्या विद्यार्थ्यांचे शिष्यवृत्ती अर्ज अद्याप नोंदणी झालेली नाहीत, अशा अनुसूचित जाती, विजाभज, इमाव व विमाप्र प्रवर्गातील विद्यार्थ्यांसाठी शिष्यवृत्ती योजनेचे नवीन अर्ज नोंदणी करणे व जुन्या अर्जांचे नूतनीकरण करणे तसेच महाविद्यालय स्तरावरील प्रलंबित अर्ज मंजुरीस पाठविण्यासाठी ३१ मार्चपर्यंत मुदतवाढ देण्यात आली आहे, अशी माहिती समाज कल्याण विभागाचे सहायक आयुक्त संतोष चिकणे यांनी दिली. याबाबत समस्या उद्भवल्यास अधिक माहितीसाठी सहाय्यक आयुक्त, समाज कल्याण, सिंधुदुर्ग कार्यालय येथे संपर्क साधावा, असे आवाहनही श्री. चिकणे यांनी केलेले आहे.

प्रशिक्षणार्थींना टॅबचे वाटप
सिंधुदुर्गनगरी ः इतर मागास व बहुजन कल्याण विभागांतर्गत महात्मा ज्योतिबा फुले संशोधन व प्रशिक्षण संस्था (महाज्योती) नागपूर या संस्थेमार्फत जेईई, नीट, एमएचटी-सीईटी (JEE, NEET, MHT-CET) चे प्रशिक्षण घेणाऱ्या विद्यार्थ्यांना येथील डॉ. बाबासाहेब आंबेडकर सामाजिक न्याय भवन येथे विद्यार्थ्यांना टॅबचे वाटप करण्यात आले.
कार्यक्रम प्रसंगी महापुरुषांच्या प्रतिमेस पुष्पहार अर्पण करून अभिवादन केले. अध्यक्षस्थानी समाज कल्याण विभागाचे सहायक लेखाधिकारी भालचंद्र कापडी उपस्थित होते. प्रशिक्षण घेणाऱ्या जिल्ह्यातील विजाभज, इमाव व विमाप्र या प्रवर्गातील विद्यार्थ्यांना टॅब, टॅब कव्हर तसेच दररोज ६ जीबी डाटासह सिमकार्डचे वाटप करण्यात आले. यावेळी अनिल बोरीकर, अमोल श्रीमानवार, संतोष परुळेकर, सुनील बागुल, रवी जाधव, कलिंगण, मयूर कदम आदी कर्मचाऱ्यांनी सहकार्य केले. मुख्याध्यापक आनंद कर्पे यांनी प्रास्ताविक केले. अनिल बोरीकर यांनी आभार मानले.