फोटो

जनसंघच्या ज्येष्ठ कार्यकर्त्या
लीलाताई मुकादम यांचे निधन
रत्नागिरी, ता. ६ : जनसंघ व भारतीय जनता पक्षच्या ज्येष्ठ कार्यकर्त्या लीलाताई मुकादम (माई, वय 90) यांचे गुरुवारी (ता. 6) सकाळी वृद्धापकाळाने निधन झाले. त्यांच्यावर रात्री अंत्यसंस्कार करण्यात आले. त्यांच्या मागे पुत्र रत्नागिरी जिल्हा मध्यवर्ती बँकेमधील निवृत्त अधिकारी अविनाश, सून, मुलगी, तसेच नातू-नातसुना, नाती-नातजावई असा मोठा परिवार आहे. ज्येष्ठ पत्रकार अरविंद कोकजे यांच्या त्या ज्येष्ठ भगिनी होते. लीलाताईंनी मोठ्या कष्टाने आणि जिद्दीने सामान्य आर्थिक परिस्थितीत संसार उभा केला होता. संघ परिवार आणि जनसंघ यांच्या कार्यकर्त्यांची त्या नेहमीच विचारपूस करीत असत. संघाच्या कार्यकर्त्यांची कधी कधी त्यांच्याकडे जेवणाचीही व्यवस्था असे. जनसंघात सुरुवातीच्या काळात महिला मोजक्याच कार्यकर्त्या होत्या. त्यापैकी माई या एक होत्या. त्या काळातील अहिल्या पटवर्धन, सुमन केतकर, हेमप्रभा जोशी, मंगलाताई भावे आदी कार्यकर्त्यांबरोबर माई मुकादम याही जनसंघाच्या महिला आघाडीचे काम करीत होत्या. आज त्यांच्या निधनाने जनसंघाच्या जुन्या महिला कार्यकर्त्यांमधील शेवटचा दुवा संपला आहे.