-rat१०p२६.jpg-
९४८३३
रत्नागिरी : बोलताना प्रवीण मोरे. सोबत जिल्हाध्यक्ष दीपक घवाळी, विनोद नारकर, आसक्ती भोळे, प्रकाश कदम आदी.
-
खासगी शाळांच्या मुख्याध्यापकांचे अधिवेशन

रत्नागिरीत आयोजन ; २३ एप्रिलला शिक्षणमंत्र्यांसह मंत्री येणार

रत्नागिरी, ता. १० : महाराष्ट्र राज्यातील खासगी प्राथमिक शाळांच्या मुख्याध्यापकांचे राज्यव्यापी अधिवेशन येत्या २३ एप्रिलला रत्नागिरीत होणार आहे. त्याकरिता शिक्षणमंत्री दीपक केसरकर, सार्वजनिक बांधकाम मंत्री रवींद्र चव्हाण, पालकमंत्री उदय सामंत व अन्य मंत्री उपस्थित राहणार आहेत. महाराष्ट्र राज्य मान्य खासगी प्राथमिक शिक्षक व शिक्षकेतर महासंघाच्या रत्नागिरी शाखेने अधिवेशनाच्या यशस्वीतेसाठी जोरदार तयारी सुरू केली आहे.
रत्नागिरी जिल्हा अध्यक्ष दीपक घवाळी यांच्या अध्यक्षतेखाली चिपळूण व रत्नागिरी येथे तालुकास्तरीय सभा घेण्यात आल्या. त्या वेळी अधिवेशन यशस्वीरित्या पार पडण्यासाठी श्री. घवाळी यांनी शिक्षक बंधू - भगिनींना मार्गदर्शन केले. विविध समित्या स्थापन करण्यात आल्या. चिपळूण तालुका अध्यक्ष रमेश कदम, रत्नागिरी तालुका अध्यक्ष प्रकाश कदम, मुख्याध्यापक विनोद नारकर, सुनील डांगे, मुख्याध्यापिका आसक्ती भोळे, मुख्याध्यापिका प्राजक्ता कदम यांच्यासह मुख्याध्यापक, शिक्षक व शिक्षकेतर बंधू - भगिनी उपस्थित होते.
अधिवेशनाला मंत्र्यांसमवेत खासदार विनायक राऊत, महासंघाच्या राज्य कार्याध्यक्षा व विधान परिषदेच्या आमदार उमाताई खापरे, चिपळूण - संगमेश्वरचे आमदार शेखर निकम, लांजा - राजापूरचे आमदार राजन साळवी, दापोलीचे आमदार योगेश कदम, गुहागरचे आमदार भास्कर जाधव, माजी आमदार बाळासाहेब माने तसेच राज्य संघटनेचे राज्याध्यक्ष राजेंद्र निकम, मुख्य सचिव विठ्ठल उरमुडे, महासंघाचे माजी अध्यक्ष व प्रमुख सल्लागार श्री. तुंगार आदी मान्यवर उपस्थित राहणार आहेत.