९४९०१
पान एक
भुईबावड्यात वादळी पाऊस
अनेक भागांत नुकसान; पूर्व पट्ट्यातील आंबा हंगाम धोक्यात
सकाळ वृत्तसेवा
वैभववाडी, ता. १० ः जिल्ह्यात वादळी वाऱ्यासह अवकाळीचे धूमशान सत्र सुरूच आहे. काल (ता. ९) रात्री उशिरा कणकवली तालुक्यातील काही गावांत पाऊस झाल्यानंतर आज सायंकाळी भुईबावडा परिसराला वादळी वारा आणि विजांच्या कडकडाटासह अवकाळी पावसाने झोडपून काढले. जिल्ह्यात सलग चौथ्या दिवशी अवकाळी पाऊस झाला असून या पावसामुळे जिल्ह्यातील पूर्वपट्टयातील आंबा हंगाम धोक्यात आला आहे.
सिंधुदुर्ग जिल्ह्याच्या विविध भागांत गेल्या तीन-चार दिवसांपासून वादळी वारा आणि विजांच्या कडकडाटासह अवकाळी पाऊस पडत आहे. अनेक भागांत तर वादळामुळे मोठे नुकसान झाल्याचे समोर आले आहे. काल देखील जिल्ह्याच्या काही भागात अवकाळी पाऊस झाला. रात्री उशिरा कणकवली तालुक्यातील शिवडाव, कनेडी, फोंडा या भागात अवकाळी पावसाच्या सरी बरसल्या. आज सकाळपासून जिल्ह्यात प्रचंड उष्मा वाढला होता. दुपारी ३ वाजल्यापासून वैभववाडी तालुक्यातील भुईबावडा, ऐनारी, भुईबावडा घाट, करुळ घाट, तिरवडे तर्फे खारेपाटण या परिसरात विजांचा कडकडाट सुरू झाला. वादळी वारे वाहु लागले आणि जोरदार पावसाला सुरुवात झाली. सरींवर सरी कोसळत होत्या. त्यामुळे पावसाळ्याप्रमाणे रस्त्यावरून पाणी वाहत होते. या भागात अर्धातास पाऊस झाला.
जिल्ह्याच्या पूर्वपट्टयातील गावांमध्ये सतत अवकाळी पाऊस पडत आहे. त्यामुळे या पट्टयातील संपूर्ण आंबा हंगाम संकटात सापडला आहे. त्यामुळे शेतकऱ्यांमध्ये चिंतेचे वातावरण आहे.