शिरवल येथे विठ्ठल रखुमाई
मंदिरात अखंड हरिनाम सप्ताह

गुरुवारपासून विविध कार्यक्रमांचे आयोजन

कणकवली,ता. १७ ः शिरवल, टेंबवाडी (ता.कणकवली) येथील श्री विठ्ठल रखुमाई मंदिराच्या ८ व्या वर्धापन दिनानिमित्त २० ते २७ एप्रिल या कालावधीत श्री ग्रंथराज ज्ञानेश्वरी सामुदायिक पारायण, अखंड हरिनाम सप्ताहाचे आयोजन करण्यात आले आहे. या सोहळ्याचे उद्‍घाटन २० एप्रिल रोजी सकाळी नऊला तहसीलदार आर. जे. पवार, काशिनाथ फोकमारे महाराज शेगाव यांच्या हस्ते तसेच सिंधुदुर्ग जिल्हा वारकरी संप्रदाय सिंधुदुर्ग, सर्व वारकरी व शिरवल गावातील समस्त ग्रामस्थ यांच्या उपस्थितीत होणार आहे.
या अखंड हरिनाम सप्ताहानिमित्त दररोज सकाळी ५ ते ६.३० काकड आरती, सकाळी ६.३० ते ७.३० - ‘श्रीं’ची महापूजा, सकाळी ८ ते १२ - ग्रंथवाचन, दुपारी १२.३० ते २ महाप्रसाद, दुपारी ३ ते ५ ग्रंथवाचन, सायं. ६.३० ते ७.३० हरिपाठ, रात्री ८ ते १० - कीर्तन आणि रात्री १० नंतर महाप्रसाद असे कार्यक्रम होतील. त्याचप्रमाणे या सप्ताहात २० एप्रिलला विश्वनाथ गवंडळकर महाराज (शिरवल), २१ एप्रिलला रमाकांत गायकवाड महाराज (फोंडा, हरकुळ), २२ एप्रिलला रविंद्र तटकरे महाराज (रायगड), २३ एप्रिलला श्रीकृष्ण घाटे महाराज (देवगड), २४ एप्रिलला संभाजी चव्हाण महाराज (कोल्हापूर), २५ एप्रिलला प्रभाकर फुलसुंदर महाराज (पुणे) यांची कीर्तनसेवा होईल. तसेच २५ एप्रिलला सायंकाळी ४.३० ते ५.३० महिलांसाठी हळदीकुंकू समारंभाचे आयोजन करण्यात आले आहे. तसेच २६ एप्रिलला मंदिराच्या आठव्या वर्धापन दिनानिमित्त सकाळी ५.३० ते ६.३० काकड आरती झाल्यानंतर अभिषेक व महापूजा, ९ ते १२ यावेळेत ग्रंथराज श्री ज्ञानेश्वरी पारायण, दुपारी महाप्रसाद, सायंकाळी शिरवल ग्रामदैवत रवळनाथ मंदिरापर्यंत ग्रंथदिंडी काढण्यात येईल. त्यानंतर विठ्ठल मंदिरात दीपोत्सव, रात्री ८ ते १० काशिनाथ महाराज फोकमारे यांची कीर्तनसेवा होईल. तसेच २७ एप्रिल रोजी सकाळी ९.३० ते ११.३० काशिनाथ महाराज फोकमारे यांचे काल्याचे कीर्तन आणि त्यानंतर महाप्रसाद वाटप होऊन या सप्ताहाची सांगता होईल.