२० (पान २ साठी)

खासगी प्राथमिक शिक्षक शिक्षकेतर महासंघाचे अधिवेशन

आज रत्नागिरीत आयोजन ; मंत्री, खासदार आमदारांची उपस्थिती

रत्नागिरी, ता. २२ ः महाराष्ट्र राज्य मान्य खासगी प्राथमिक शिक्षक, शिक्षकेतर महासंघाचे राज्यव्यापी अधिवेशन उद्या (ता. २३) येथील जयेश मंगल पार्क येथे आयोजित केले आहे. या अधिवेशनाचे उद्घाटन उद्योगमंत्री तथा रत्नागिरीचे पालकमंत्री उदय सामंत यांच्या हस्ते सकाळी ९.३० वा. होणार आहे.
या संमेलनाचे स्वागताध्यक्ष माजी आमदार बाळ माने असून, कार्यक्रमाला शालेय शिक्षणमंत्री दीपक केसरकर, सार्वजनिक बांधकाममंत्री रवींद्र चव्हाण, आमदार योगेश कदम, आमदार शेखर निकम, उद्योजक रवींद्र सामंत, प्राथमिक शिक्षणाधिकारी वामन जगदाळे उपस्थित राहणार आहेत. रत्नागिरीमध्ये प्रथमच महासंघाचे अधिवेशन होत असल्याने रत्नागिरीतील खासगी प्राथमिक शाळांतील शिक्षकांनी नियोजन केले आहे. या अधिवेशनाला राज्यातील विविध मंत्री व मान्यवर व्यक्ती, महासंघाचे विविध पदाधिकारी उपस्थित राहणार आहेत.
प्राथमिक शिक्षक व शिक्षकेतर महासंघ अखिल भारतीय राष्ट्रीय शैक्षिक महासंघाशी संलग्न आहे. महासंघाची स्थापना जून १९७१ मध्ये झाली असून तेव्हापासून प्रतिवर्षी अधिवेशन आयोजित केले जात आहे तसेच शिक्षक, शिक्षकेतर कर्मचाऱ्यांचे प्रश्न सोडवण्यासाठी प्रयत्न केले जात आहेत. रत्नागिरी जिल्हाध्यक्ष दीपक घवाळी, उपाध्यक्ष विनोद नारकर, सचिव सुनील डांगे, कार्याध्यक्ष अरविंद सकपाळ, कार्याध्यक्ष समीर खोत, मुख्याध्यापिका प्रतिनिधी आसक्ती भोळे आणि सर्व तालुकाध्यक्ष, पदाधिकारी यांनी अधिवेशनाचे नियोजन केले आहे.
अधिवेशनाची सांगता दुपारी ३ वा. होणार आहे. या वेळी आमदार तथा महासंघाच्या राज्य कार्याध्यक्षा उमा खापरे अध्यक्षस्थानी असून प्रमुख पाहुणे म्हणून रत्नागिरीचे खासदार विनायक राऊत यांच्यासह आमदार भास्कर जाधव, आमदार राजन साळवी, आमदार नागो गाणार, अखिल भारतीय शैक्षिक महासंघाचे अतिरिक्त महामंत्री संजय राऊत, नगरपालिका शिक्षण मंडळ प्रशासनाधिकारी सुनील पाटील, गटशिक्षणाधिकारी प्रेरणा शिंदे उपस्थित राहणार आहेत.