१६ (पान २ साठी)

इंदिरा इन्स्टिट्यूटची नॅक मुल्यांकनमध्ये भरारी

साडवली, ता. २९ ः प्रबोधन शिक्षण प्रसारक संस्था संचलित साडवलीतील इंदिरा इन्स्टिट्यूट ऑफ फार्मसीला राष्ट्रीय मूल्यांकन आणि मान्यता परिषद म्हणजेच नॅकद्वारे घेण्यात आलेल्या दुसऱ्या फेरीत B++ श्रेणी प्रदान करण्यात आली आहे. मुंबई विद्यापिठाशी संलग्नित असणाऱ्या या महाविद्यालयाने २०१७ ला मुल्यांकनाच्या पहिल्या फेरीत २.०९ CGPA गुण मिळवत B श्रेणी मिळवत नॅक मूल्यांकन असणारं कोकणातील पहिलं फार्मसी महाविद्यालय होण्याचा बहुमान मिळवला होता. त्यानंतर गेली ५ वर्षे दर्जेदार शिक्षणावर भर देत दुसऱ्या फेरीसाठी पुनर्मुल्यांकन केले.
नॅकद्वारे नियुक्त केलेल्या तीन तज्ञ आणि प्रतिष्ठित मुल्यांकनकर्त्यांचा समावेश असलेल्या निरीक्षण समितीने महाविद्यालयास भेट दिली. यामध्ये प्रामुख्याने महाविद्यालयातील अभ्यासक्रम, अध्यापन दर्जा, केले जाणारे संशोधन, नावीन्यपूर्ण शिक्षण, राबवले जाणारे समाजोपयोगी उपक्रम, महाविद्यालयाचे दूरदृष्टिकोन आणि भविष्यातील धोरण, शिक्षकांचा दर्जा, मूलभूत सोईसुविधा इत्यादींच्या आधारे मूल्यांकन करण्यात आले. यामध्ये महाविद्यालयातील पायाभूत सुविधा, १०० टक्के घेतला जाणार अभासक्रम, सुसज्ज ग्रंथालय, दिली जाणारी प्लेसमेंट तसेच इतर गोष्टींबरोबरच औद्योगिक क्षेत्राशी असणारे महाविद्यालयाचे संबंध, दिल्या जाणाऱ्या सुविधा याबद्दल मूल्यांकनकर्त्यांकडून विशेष प्रशंसा मिळवली. महाविद्यालयाचे प्राचार्य डॉ. अमोल खाडे यांनी संस्थाध्यक्ष रवींद्र माने आणि संस्था पदाधिकारी यांनी केलेल्या मार्गदर्शनाबद्दल आभार व्यक्त केले.