03850
तिलारी ः घाटात उलटलेला कँटर. (छायाचित्र ः संदेश देसाई)

तिलारी घाटात कँटर
उलटून दोघे जखमी

ब्रेक निकामी झाल्याने अपघात

सकाळ वृत्तसेवा
दोडामार्ग, ता. १९ ः तिलारी घाटातील जयकर पॉईंट येथे ब्रेक निकामी झाल्याने कँटर पलटी झाला. ही घटना आज सकाळी नऊच्या सुमारास घडली. कँटर रस्त्यातच पलटी झाल्याने तो खोल दरीत कोसळण्यापासून वाचला. सुदैवाने चालक व वाहकाला किरकोळ दुखापत झाली.
तिलारी घाटात अपघातांचे प्रमाण वाढत आहे. गेल्या तीन चार महिन्यात अनेक अपघात घडले आहेत. हा घाट रस्ता अतिशय तीव्र उताराचा, अवघड वाळणांचा व अरुंद आहे. कोल्हापूर, बेळगाव ते गोव्याला वाहतुकीसाठी हा मार्ग जवळचा आहे. त्यामुळे या घाटातून वाहतूक करणाऱ्या वाहनांची संख्या दिवसागणिक वाढत आहे. गुगल मॅपवर प्रवास करणाऱ्यांना हा मार्ग जवळचा दाखविला जातो. त्यामुळे परराज्यातून येणारे पर्यटकही या घाटातून प्रवास करीत असतात. परिणामी हा अवघड घाट मार्ग त्या चालकांना अनभिज्ञ असल्याने वळणाचा अंदाज त्यांना येत नाही. त्यामुळे काही जणांच्या जिवावरही बेतले आहे. गोव्याच्या दिशेने वाहतुक करणारा एक कँटर आज तिलारी घाटातून जात होता. तो तीव्र उतार व अवघड वळण असलेल्या जयकर पॉईंट येथे आला असता त्याचे ब्रेक निकामी झाले आणि पलटी झाला. रस्त्यावरच तो पलटी झाल्याने खाली खोल दरीत पडण्यापासून तो वाचला. या अपघातात चालक व वाहकाला किरकोळ दुखापत झाली. या वळणावर वारंवार अपघात होत असतात. त्यामुळे वाहने खोल दरीत कोसळू नयेत, यासाठी त्या ठिकाणी मातीचा ढिगारा टाकण्यात आला आहे. याच ढिगाऱ्यामुळे ब्रेक निकामी झालेला कँटर खोल दरीत कोसळण्यापासून वाचला.