पान १ साठी

०७६३०

कोकण कृषी विद्यापीठाच्या
कुलगुरूपदी डॉ. संजय भावे
दाभोळ, ता. ६ ः डॉ. बाळासाहेब सावंत कोकण कृषि विद्यापीठाच्या कुलगुरुपदी डॉ. संजय भावे यांची नियुक्ती केली आहे. राज्यपाल आणि विद्यापीठांचे कुलपती रमेश बैस यांनी डॉ. भावे यांची नियुक्ती केली आहे. डॉ. संजय भावे या विद्यापीठाचे १५ वे कुलगुरु म्हणून विद्यमान कुलगुरू डॉ. उज्वला चक्रदेव यांच्याकडून पदभार स्वीकारतील.
डॉ. भावे सिंधुदुर्ग जिल्ह्याचे सुसूत्र असून कोकण कृषी विद्यापीठाचे माजी विद्यार्थी आहेत. याच विद्यापीठामधून त्यांनी अनुवंशिकता आणि वनस्पती प्रजनन (Genetics and Plant Breeding) या विषयात आचार्य पदवी प्राप्त केली आहे. गेली २३ वर्षे ते या विद्यापीठात विविध पदांवर कार्यरत आहेत. नोकरीची सुरुवात सहाय्यक प्राध्यापक पदापासून केली. त्यानंतर ते सहयोगी प्राध्यापक, प्राध्यापक, विभाग प्रमुख, सहयोगी अधिष्ठाता (वनशास्त्र), संचालक, विस्तार शिक्षण, या पदांवर काम केले आहे. सध्या ते विद्यापीठामध्ये संशोधन संचालक या पदावर कार्यरत आहेत.
डॉ. भावे यांनी आत्तापर्यंत १२ आचार्य पदवी विद्यार्थ्यांना तर ३५ पदव्युत्तर विद्यार्थ्यांना संशोधन मार्गदर्शक म्हणून मार्गदर्शन केले आहे. संशोधक म्हणून त्यांनी आत्तापर्यंत विविध तृणधान्य, कडधान्य आणि गळीतधान्य पिकांच्या २१ जाती विकसित केल्या आहेत. लाल भाताची रत्नागिरी ७ आणि रत्नागिरी ८ या जाती विकसित करण्यात महत्त्वपूर्ण योगदान दिले आहे. कोकणातील विविध गावांमध्ये एक गाव एक उत्पादन ही संकल्पना राबविली. शेतकऱ्यांसाठी किमान कौशल्यावर आधारीत विविध प्रशिक्षण कार्यक्रम राबविले. सिंधुदुर्ग जिल्हा विकास नियोजन समितीच्या निधीतून जिल्हयामध्ये अन्न सुरक्षा दलांची स्थापना केली आणि त्यातून शेतकऱ्यांचे उत्पादन वाढविण्यासाठी आणि रोजगारनिर्मितीसाठी प्रयत्न केले. डॉ. भावे यांच्या कृषि शिक्षण, संशोधन आणि विस्तार शिक्षणातील योगदानाबद्दल त्यांना वसंतराव नाईक कृषि भूषण पुरस्कार, छत्रपती शिवाजी महाराज वनश्री पुरस्कार अशा विविध पुरस्कारांनी गौरविले गेले आहे. डॉ. भावे यांच्या रुपाने एक जाणकार, लोकप्रिय आणि अनुभवी व्यक्ती कुलगुरुपदी विराजमान होणार असल्याने विद्यापीठ परिवारात तसेच कोकणात सर्वत्र आनंद व्यक्त करण्यात येत आहे.