मुख्यमंत्री ग्रामसडक योजनेंतर्गत
वेंगुर्लेला ८ कोटी २० लाख निधी
वेंगुर्ले, ता. १६ ः मुख्यमंत्री ग्रामसडक योजनेंतर्गत शालेय शिक्षणमंत्री तथा सावंतवाडी विधानसभा मतदारसंघाचे आमदार दीपक केसरकर यांच्या माध्यमातून तालुक्यातील महत्वाच्या सहा रस्त्यांच्या कामांसाठी सुमारे ८ कोटी २० लाख रुपयांचा निधी मंजूर झाल्याची माहिती शिवसेनेचे तालुकाप्रमुख नितीन मांजरेकर यांनी दिली.
याबाबत दिलेल्या प्रसिद्धी पत्रकात म्हटले आहे की, सिंधुदुर्ग जिल्हा नियोजन मंडळाकडे तालुक्यातील ग्रामीण भागातील अत्यावश्यक रस्त्यांच्या कामांचे प्रस्ताव सादर करण्यात आले होते. स्थानिकांनी सुचविलेल्या या कामांचे प्रस्ताव मंजूर होण्यासाठी शिक्षणमंत्री केसरकर यांनी जिल्हाधिकारी व मुख्यमंत्री कार्यालयाकडे पाठपुरावा सुरू ठेवला होता. पालकमंत्री रवींद्र चव्हाण यांनी जिल्हा नियोजन मंडळाच्या सभेत ही कामे प्राधान्याने मंजूर होण्यासाठी जिल्हाधिकाऱ्यांना मुख्यमंत्री कार्यालयात प्रस्ताव पाठविण्याची सूचना केली होती. त्यानुसार ही कामे मंजूर झाली आहेत. यात वेंगुर्ले तालुक्यातील मातोंड, चिरेखण, दळवीवाडी, नाईकवाडी ते न्हावेली रस्ता, (१ कोटी ८८ लाख), परुळे-कालवण रस्ता (१ कोटी ४५ लाख), चिपी गाडेधाव-कालवण रस्ता (१ कोटी १८ लाख), प्रधानमंत्री जिल्हा मार्ग ५६ ते मातोंड सातवायंगणी घोडेमुख १८६ जोड रस्ता (१ कोटी ६ लाख), होडावडे शाळा नंबर १ ते राऊळवाडी वजराट रस्ता (१ कोटी १८ लाख), आडेली धरण भोवरवाडी रस्ता (१ कोटी ४२ लाख) अशा एकूण सहा रस्त्यांच्या कामांसाठी सुमारे ८ कोटी २० लाख रुपयांचा निधी मंजूर झाला असून या कामांना लवकरच प्रारंभ केला जाईल, अशी माहिती मांजरेकर यांनी दिली.