इंटरनेट टेक्नॉलॉजी कंपनीसाठी
कुडाळ येथे २७ ला मुलाखती

कुडाळ, ता. १८ ः जस्ट डायल लिमिटेड मुंबई या आयटी कंपनीसाठी गोवा व सिंधुदुर्ग या ठिकाणी पदवी व पदव्युत्तर परीक्षा उत्तीर्ण विद्यार्थ्यांमधून किमान ५० उमेदवार नियुक्त करावयाचे आहेत. जिल्ह्यातील इच्छुक व गरजू पात्र उमेदवारांनी बाबासाहेब वेंगुर्लेकर महाविद्यालय, पणदूरतिठा (ता. कुडाळ) येथे मंगळवारी (ता. २७) सकाळी अकराला होणाऱ्या कॅम्पस मुलाखतीस उपस्थित राहावे, असे आवाहन संस्थेचे कार्याध्यक्ष शशिकांत अणावकर व सचिव डॉ. अरुण गोडकर, प्राचार्य डॉ. संभाजी शिंदे यांनी केले आहे.
यासाठी कोणत्याही शाखेचा पदवीधर किंवा पदव्युत्तर परीक्षा उत्तीर्ण असलेल्या उमेदवारांनी मुलाखतीसाठी उपस्थित राहावे. या इंटरनेट टेक्नॉलॉजी कंपनीमध्ये किमान दोन लाख ते तीन लाख रुपयांचे पॅकेज असून कार्यकुशल उमेदवारांना अधिकचे वाढीव लाभ मिळणार आहेत. या मुलाखतीसाठी केवळ पुरुष पदवीधारकांनाच प्राधान्य राहील. संवाद कौशल्य असलेल्या उमेदवारांना प्राधान्य दिले जाईल. उमेदवार १८ ते ३५ वयोगटातील असावा. उमेदवारांना सर्टिफाइड इंटरनेट कन्सल्टंट म्हणून अथवा फिल्ड सेल्स जॉब करावा लागेल. निवडलेल्या उमेदवारांना ग्रॅच्युइटी, वैद्यकीय विमा, अपघात विमा आदी फायदे मिळतील. महाविद्यालयाच्या www.pbvm.co.in या संकेतस्थळावर Facilities या सेक्शनमध्ये Training & Placement वर क्लिक करून २५ जूनपर्यंत मुलाखतीसाठी नाव नोंदणी करावी, असे आवाहन करण्यात आले आहे.