प्रसुती विभागात डॉ. सांगवीकर रुजू
रत्नागिरी, ता. ३ : अखेर जिल्हा शासकीय रुग्णालयाच्या प्रसुती विभागात काम करणारे डॉ. विनोद सांगवीकर रुजू झाल्याने प्रसुती विभागाचा डॉक्टरांचा प्रश्न मार्गी लागला आहे. हजर झाल्यानंतर डॉ. सांगवीकर यांनी काही शस्त्रक्रिया केल्या.
आमदार राजन साळवी यांनी जिल्हा शासकीय रुग्णालयातील समस्याबाबत जिल्हाधिकारी एम. देवेंदर सिंह यांच्या समवेत बैठक झाली. २६ जूनपर्यंत प्रसुतीगृहात काम करणारे डॉ. विनोद सांगवीकर यांची पदोन्नतीनुसार बदली झाल्याने जिल्हा रुग्णालयातील प्रसुती विभागात डॉक्टर नसल्याने मोठी अडचण निर्माण झाली होती. त्याबाबत तत्काळ समस्या सोडविण्यासाठी मुदत देऊनही कोणतीही कार्यवाही न झाल्यामुळे शासकीय रुग्णालयात टाळे ठोको आंदोलन करण्याचा इशारा दिला होता. त्यानंतर ताबडतोब शासनाकडून दखल घेऊन काही दिवसातच डॉ. सांगवीकर रुजू झाले.