पान २ साठी
१५२३६

मनसेची एक सही
संतापाची मोहीम
चिपळूणमध्ये प्रारंभ; ग्रामस्थांनी दिला प्रतिसाद
चिपळूण, ता. १० ः एक सही संतापाची मनसेच्या या मोहिमेला मतदारांनी भरभरून प्रतिसाद देत आपला संताप व्यक्त केला. पक्षाच्या आदेशानुसार वाहतूक सेना रत्नागिरी जिल्ह्याच्यावतीने चिपळूण बहादूरशेखनाका येथे मोहीम राबवण्यात आली. या वेळी मतदारांनी प्रचंड प्रतिसाद देऊन आपला संताप व्यक्त केला.
मनसे अध्यक्ष राज ठाकरे यांच्या आदेशानुसार, मनसेच्या विविध अंगीकृत संघटनांच्यावतीने एक सही संतापाची ही मोहीम राबवली जात आहे. राज्यात ज्यांना निवडून देण्यात आले आहे त्यांनी तर राजकारणाचा चिखल केला आहे. कोण कोणत्या पक्षात जाईल, हे सांगणे अवघड झाले आहे. चार वर्षात अनेकवेळा सत्ताबदल झाला आहे. मतदारांचा विश्वासघात केला जात आहे. मतदारांच्या मनातील संताप आता सह्याच्या रूपाने व्यक्त होऊ लागला आहे.
एकदा मतदान केले की, तुम्हाला गृहित धरणार? राजकारणाचा चिखल झाला आहे का? असे प्रश्न करत जर संताप होत असेल तर त्या संतापाची सही करून आपला संताप नोंदवा, अशा पद्धतीची मोहीम मनसे राज्यात राबवत आहे. बहादूरशेख नाका येथे रत्नागिरी जिल्हा वाहतूक सेनेच्यावतीने आज राबवण्यात आली. बहादूरशेख नाका येथे वाहतूक सेनेचे जिल्हाध्यक्ष राजू खेतले यांच्या नेतृत्वाखाली या मोहिमेचा प्रारंभ केला. एक सही संतापाची या बोर्डवर आज दुपारपर्यंत दोनशे ते अडीचशे मतदारांनी सह्या करून आपला संताप व्यक्त केला आहे. राज ठाकरे यांच्या आदेशानुसार राबवण्यात आलेल्या या मोहिमेला बहादूरशेख येथे प्रचंड प्रतिसाद मिळाल्याचे दिसत आहे.
वाहतूक सेनेचे जिल्हाध्यक्ष राजू खेतले म्हणाले, ‘‘मला माझ्या दैवताचा अभिमान वाटत आहे. या चिखलात आमचा नेता आणि आमचा पक्ष नाही. सर्व पक्षांनी राजकारणाचे वाटोळे केले आहे. म्हणूनच एकवेळेला फक्त मनसेला सत्तेत बसवा. बघा, महाराष्ट्र राज्य कसे प्रगतीपथावर असेल. आता आपण मतदारांनी जागरूक होऊन मतदान केले पाहिजे अन्यथा हे असेच सुरू राहील. यासाठी मतदारांनी पुढाकार घेतला पाहिजे.’’
या वेळी प्रदीप संसारे, मंगेश महाडिक, राहुल शिंदे, संजय भोसले, संजय वाजे, प्रशांत हटकर, विठ्ठल दाते, रूपेश शेट्टे, निरंजय निर्मळ, मनोज कोलगे, गजानन राक्षे आदी पदाधिकारी, कार्यकर्ते मोठ्या संख्येने उपस्थित होते.