कांदळवन संरक्षणासाठी टोल फ्री क्रंमाक
रत्नागिरी, ता. १० ः कांदळवन संरक्षणाच्यादृष्टीने जिल्हा प्रशासाने पुढचे पाऊल उचलले आहे. कंदळवनाची राजरोस तोड रोखण्यासाठी आणि नागरिकांच्या तक्रारीसाठी टोल फ्री क्रमांक जाहीर करण्यात आला आहे. १८००-२३३-२६८७ असा हा नंबर असून तक्रार असल्यास या क्रमांकावर संपर्क साधावा, असे आवाहन जिल्हा प्रशासनाकडून करण्यात आले आहे. कांदळवन संरक्षण व संवर्धनाच्या अनुषंगाने तक्रारी स्वीकारणे व तक्रारीचे निवारण होण्याच्या अनुषंगाने जिल्हास्तरावर बैठक झाली. यामध्ये टोल फ्री नंबर उपलब्ध करून देण्याबाबतच्या सूचना नुकत्याच विभागस्तरावरून देण्यात आल्या होत्या. कांदळवनाच्या ऱ्हासाबाबत व तोडीबाबत जिल्हास्तरावर तक्रारी दाखल करण्यासाठी जिल्हाधिकारी कार्यालयामध्ये हा टोल फ्री नंबर १८००-२३३-२६८७ उपलब्ध करून दिला आहे. कांदळवन संरक्षण व संवर्धनाच्या अनुषंगाने नागरिकांच्या जर काही तक्रारी असतील तर त्यांनी वरील क्रमांकावर संपर्क साधावा, असे जिल्हा प्रशासनाने कळवले आहे.