डीएड्, बीएड्धारकांच्या आनंदावर विरजण
रिक्त जागांवर नियुक्तीची आशा फोल ; प्राथमिक शिक्षक संघटनेचा विरोध
राजापूर, ता.११ः गेल्या काही वर्षांमध्ये शिक्षकभरती न झाल्याने अनेक डीएड्, बीएड् झालेले विद्यार्थी शिक्षण घेऊनही बेरोजगार राहिले आहेत. रिक्त असलेल्या शिक्षक जागांवर मानधन तत्त्वावर नियुक्त्या झाल्याने त्यांना एकप्रकारे दिलासा मिळाला आहे; मात्र, शासनाने राज्यामध्ये मोठ्या प्रमाणात रिक्त असलेल्या शिक्षकांच्या जागांवर सेवानिवृत्त शिक्षकांच्या नियुक्त्या करण्याचा निर्णय घेतला आहे. त्यामुळे बेरोजगार डीएड्, बीएड्धारकांचा शिक्षक होण्याच्या आनंदावर विरजण पडले आहे. त्याला महाराष्ट्र पुरोगामी प्राथमिक शिक्षक संघटनेकडून विरोध केला जात असून रिक्त जागांवर सेवानिवृत्त शिक्षकांना मानधन तत्त्वावर घेण्यापेक्षा बेरोजगार डीएड्, बीएड्धारकांना नियुक्त्या देण्याची मागणी पुरोगामी शिक्षक संघटनेने केली आहे.
महाराष्ट्र पुरोगामी शिक्षक संघटनेकडून या विषयी शासन व प्रशासनाकडे योग्य तो पाठपुरावा करण्यात येणार असून वेळप्रसंगी महाराष्ट्र पुरोगामी प्राथमिक शिक्षक संघटनेचे राज्याध्यक्ष प्रसाद पाटील, राज्य सरचिटणीस हरिश ससनकर यांच्या मार्गदर्शनाखाली योग्य तो लढा पुकारून बेरोजगार युवकांना न्याय मिळवून देण्यासाठी प्रयत्न करण्याचा निर्धार केला आहे. त्याबाबतची माहिती शिक्षक संघटनेचे राज्यकार्याध्यक्ष प्रकाश पाध्ये, रत्नागिरी जिल्हानेते प्रदीप पवार, जिल्हाध्यक्ष यशवंत पेढांबकर, कोकण विभाग अध्यक्ष विनायक खानविलकर यांनी दिली.
शासनाने एका परिपत्रकाद्वारे राज्यात मोठ्या प्रमाणात रिक्त असलेल्या प्राथमिक शिक्षकांच्या जागेवर सेवानिवृत्त झालेल्या शिक्षकांना नेमणुका देण्याचे जाहीर केले आहे. त्याचा फटका या बेरोजगार डीएड्, बीएड्धारकांना बसणार आहे. त्याबाबत महाराष्ट्र प्राथमिक शिक्षक पुरोगामी संघटनेकडून तीव्र नाराजी व्यक्त केली जात आहे.

डीएड्, बीएड्धारकांची नियुक्ती करावी
सेवानिवृत्त कर्मचारी हा वयोमानानुसार निवृत्त होत असून वयोमान झाल्यामुळे कार्य करण्याची तीव्र इच्छा त्यांच्यामध्ये नसते तर, काही कर्मचारी विविध वैद्यकीय कारणांस्तव स्वेच्छानिवृत्ती घेत असतात. निवृत्तीच्या काळात त्यांना शासन योग्य ते निवृत्तीवेतन मिळते. त्याच्याऐवजी जे सुशिक्षित बेरोजगारांना नियुक्ती मिळाल्यास ते या कामाला योग्य न्याय देण्याचा प्रयत्न करू शकतात. त्यामुळे रिक्त जागांवर डीएड्, बीएड्धारकांची नियुक्ती व्हावी, अशी मागणी पुरोगामी प्राथमिक शिक्षक संघटनेकडून करण्यात आली आहे.