अरविंद रावराणेंची उमेदवारीसाठी धडपड

रोहीत पावसकर; ‘ती’ टीका वरिष्ठांना खुश करण्यासाठी

सकाळ वृत्तसेवा
वैभववाडी, ता. १८ ः ठाकरे युवा सेनेच्या जिल्हाप्रमुखांवर अरविंद रावराणेंनी केलेली टिका ही वरिष्ठांना खुश करण्यासाठी असून आगामी निवडणुकीत उमेदवारी मिळावी, यासाठीची धडपड असल्याची टिका युवासेनेचे विभागप्रमुख रोहीत पावसकर यांनी येथे केली.
ठाकरे युवासेनेचे जिल्हाप्रमुख नाईक यांनी येथील ग्रामीण रूग्णालयाला भेट दिल्यानंतर आमदार नीतेश राणेंवर टीका केली होती. त्यानंतर माजी सभापती अरविंद रावराणे यांनी श्री. नाईक यांच्यावर टीका केली होती. आता युवासेनेचे विभागप्रमुख यांनी प्रसिद्धीपत्रकातून श्री. रावराणे यांच्यावर टीका केली आहे. त्यांनी दिलेल्या पत्रकात म्हटले आहे, की ‘‘श्री. रावराणे यांनी आपले भाजप पक्षातील स्थान काय आहे हे पाहावे. केवळ वरिष्ठांना खुश करण्यासाठी टीका करू नये. ग्रामीण रूग्णालयातील
समस्या रूग्णालयातील कर्मचाऱ्यांनी श्री. नाईक यांच्यासमोर मांडल्या आहेत. त्यामुळे अपुऱ्या माहितीच्या आधारे श्री. नाईक यांनी टीका केली, असे म्हणणेच चुकीचे आहे. महाविकास आघाडीचे सरकार अडीच वर्षे होते; मात्र, तत्पुर्वी गेली अनेक वर्षे या जिल्ह्यावर नारायण राणेंचीच सत्ता होती. गेली नऊ वर्षे नीतेश राणे आमदार आहेत. याचा विसर श्री. रावराणेंना सोयीस्कर पडला आहे. आमदारांनी ग्रामीण रूग्णालयाकडे लक्ष का दिले नाही?, असा प्रश्न देखील त्यांनी उपस्थित केला. डिझेल नसल्यामुळे जनरेटर बंद, रूग्णवाहिका बंद, रक्ततपासणी मशीन बंद ही स्थिती कोणामुळे आली? याचा विचारही करावा. दोन दिवसांपूर्वी एका कर्मचाऱ्याने दारू पिऊन धिंगाणा घातला. गेले सात-आठ महिने त्याचे वर्तन असेच आहे. त्याकडे कुणी लक्ष का देत नाही? त्यामुळे श्री. रावराणे यांनी या प्रश्नांवर पहिले बोलावे, त्यानंतर त्यांनी श्री. नाईक यांच्यावर टीका
करावी.’’