पशुसंवर्धन विभागाच्या कारभारात अडचणी

कर्मचारी कमी, रिक्त पदांचा ताण; दरमहा जातो अहवाल

संदीप घाग ः सकाळ वृत्तसेवा
सावर्डे, ता. २६ ः चिपळूण पंचायत समितीअंतर्गत पशुधन विकास अधिकारीपद (विस्तार अधिकारी) अनेक वर्षे रिक्त आहे. येथील रहाटगाडा पशुधन पर्यवेक्षक व्ही. एस. बारापत्रे अनेक वर्षे हाकत आहेत तर पंचायत समितीचे साहाय्यक पशुधन विकास अधिकारी एस. एन. अहिरे कार्यालयीन कारभाराबरोबरच कापरे, नांदगाव, तुंरबव या तीन गावांतील पशुधन पर्यवेक्षकपदाचा प्रभारी कारभार करताहेत तर तालुका कार्यालयात पशुधन विकास अधिकारी, ३ पशुधन पर्यवेक्षक तसेच ग्रामीण दवाखान्यात तीन पशुधन पर्यवेक्षक अशा जागा रिक्तच असून तालुक्यात ३ परिचर पद रिक्त आहेत.
जिल्हा परिषदेंतर्गत चिपळूण तालुक्यातील ग्रामीण भागात पशुसंवर्धन विभागात आठ पशुवैद्यकीय दवाखाने असून, यामध्ये रामपूर, सावर्डे हे श्रेणी एकचे दोन पशुवैद्यकीय दवाखाने तर कापरे, नांदगाव कळकवणे, कुंभार्ली, वहाळ, तुरंबव हे श्रेणी दोनचे सहा पशुवैद्यकीय दवाखाने तालुक्यात आहेत. या आठ दवाखान्यात ५९ गावांचा समावेश आहे. पशुवैद्यकीय दवाखाना श्रेणी दोनचे सहा दवाखान्यांपैकी कापरे, नांदगाव, तुंरबव येथील पशुधनपर्यवेक्षकाची तीन पदे रिक्तच असल्याने या ठिकाणी अधिकाऱ्यांना अतिकार्यभार सोपवून प्रभारी पदभार दिला गेला आहे. राज्य शासनाकडून पशुसंवर्धन विभागात अनेक वर्षे कर्मचारी भरती झाली नसल्याने चिपळूण तालुक्यातील पशुसंवर्धन विभागाची कर्मचाऱ्यांविना कारभार करताना त्रेधातिरपिट उडाली आहे. कागदोपत्री या कार्यालयाचा कारभार व्ही. एस. बारापात्रे यांच्याकडे आहे. उर्वरित साहाय्यक पशुधन विकास अधिकारी व्ही. टी. लोकरे यांना कुंभार्ली, कळकवणे येथील पशुपर्यवेक्षक म्हणून जबाबदारी देण्यात आली आहे. वरिष्ठ साहाय्यक एम. एस. साळवी यांना चिपळूण पंचायत समितीच्या शिक्षण विभागात कामगिरीवर पाठवण्यात आले. परिचर व्ही. डी. जाधव चिपळूण पशुसंवर्धन विभागात आहेत.

चौकट
सघन कुक्कुट विकास गट ठप्प
चिपळूण तालुक्यातील कळंबस्ते येथे सघन कुक्कुट विकास गट चिपळूण नावाने राज्यस्तरावरील चिपळूण पंचायत समिती अखत्यारित संस्था गेली अनेक वर्षे कार्यरत होती. या ठिकाणी २ हजार अंडी उत्पादित करणारे पक्षी होते; मात्र २०२१ पासून शासनाकडून निधी न मिळाल्याने संस्थेस कुलूप लागले आहे. अंडी देणारे पक्षी येथे ठेवले जात होते. येथील अंडी व पक्षी शेतकऱ्यांना पैदास करण्यासाठी वितरित करण्यात येत होते. या ठिकाणी पशुधन विकास अधिकारी, साहाय्यक पशुधन विकास अधिकारी, वरिष्ठ सहाय्यक, तीन परिचर, एक रात्र पहारेकरी असे कर्मचारी होते; मात्र निधी बंद झाल्याने सर्व ठप्प झाले.

कोट
चिपळूण पंचायत समितीच्या पशुसंवर्धन विभागात जिल्हा परिषदेंतर्गत ९ संस्था असून, १ बंद आहे. कर्मचारी कमी असल्याने शेतकऱ्यांना वेळेवर सेवा देण्यास त्रास, अडचणी येत आहेत. दर महिन्याला शासनाला रिक्त पदाचा अहवाल दिला जातो.
- व्ही. एस. बारापात्रे, प्रभारी विस्तार अधिकारी.