१६ (टुडे पान ३ साठी)

खानूमध्ये नाचणी लागवडीचे प्रात्यक्षिक

पावस, ता. ३१ ः दापोलीच्या कृषी महाविद्यालयातील ग्रामीण जागरूकता कार्यानुभव कार्यक्रमांतर्गत (रावे) कार्यरत विद्यार्थ्यांच्या कृषी रत्न आणि कृषीपुत्र गटांनी रत्नागिरी तालुक्यातील खानु गावात जयश्री सुतार यांच्या शेतावर नाचणी लागवडीचे प्रात्यक्षिक दाखवले. सुतार यांच्या दोन गुंठे प्रक्षेत्रावर नाचणीच्या गावठी वाणाची रोपे ठोंबा पद्धतीने लावण्यात आली. विद्यार्थ्यांनी शेतकऱ्यांना लागवडीचे अंतर, खत व्यवस्थापन तसेच तण नियंत्रण याविषयी शास्त्रोक्त माहिती दिली.
कार्यक्रमासाठी कृषी महाविद्यालयाचे विद्यार्थी खानू गावात दाखल झाले आहेत. पुढील १८ आठवडे हे विद्यार्थी खानू गावात राहून शेती आणि त्यासंबंधी आधुनिक तंत्रज्ञानाची प्रात्यक्षिके आयोजित करणार आहेत. त्याचबरोबर विविध विस्तार शिक्षण पद्धतींचा वापर करून तंत्रज्ञान प्रसाराचे काम करणार आहेत. या प्रात्यक्षिकाच्या आयोजनासाठी संपर्क शेतकरी संदीप कांबळे आणि ग्रामस्थ अविनाश कुलकर्णी यांनी मदत केली. विद्यार्थ्यांच्या या उपक्रमांचे सर्वांनीच कौतुक केले. कार्यक्रमाच्या आयोजनासाठी महाविद्यालयाचे सहयोगी अधिष्ठाता डॉ. प्रमोद सावंत, रावे कार्यक्रम समन्वयक डॉ. विठ्ठल नाईक, केंद्रप्रमुख डॉ. आनंद हणमंते, कार्यक्रमाधिकारी डॉ.सुदेश चव्हाण, विषय विशेषज्ञ डॉ.विरेश चव्हाण यांचे मार्गदर्शन लाभले. प्रास्ताविक पुष्कर कुलकर्णी यांनी, तर कौशिक पाल याने आभार मानले. प्रात्यक्षिकासाठी खानू परिसरातील शेतकरी उपस्थित होते.