डाक सेवकांचे
१० ला आंदोलन
ओरोस ः ऑल इंडिया ग्रामीण डाक सेवक संघटना सिंधुदुर्ग, सिंधुदुर्गनगरी आणि जिल्ह्यातील सर्व ग्रामीण डाक सेवकांतर्फे १० ऑगस्टला सिंधुदुर्गनगरी येथील विभागीय डाकघर कार्यालयासमोर प्रलंबित मागण्यांसाठी दुपारी २ ते सायंकाळी ५ दरम्यान आंदोलन करण्यात येणार आहे. ऑल इंडिया ग्रामीण डाक सेवक युनियन (एआयजीडीएसयू, दिल्ली) व महाराष्ट्र सर्कल प्रदेश शाखेतर्फे तसेच केंद्रीय शाखा न्यू दिल्लीच्या आदेशानुसार १० ऑगस्टला डाक अधीक्षक सिंधुदुर्गनगरीच्या विभागीय कार्यालयासमोर प्रलंबित मागण्यांबाबत संघटना प्रतिनिधी दुपारी २ ते ५ या वेळेत विभागीय कार्यालयासमोर आंदोलन करणार आहेत. हे आंदोलन शांततेच्या मार्गाने व कार्यक्रमाला कोणतेही गालबोट न लावता राबविण्यात येणार आहे.
-------------
सिंधुदुर्गनगरीत
लोकशाही दिन
सिंधुदुर्गनगरी ः ऑगस्ट महिन्यातील लोकशाही दिन हा महिन्याच्या पहिल्या सोमवारी (ता. ७) दुपारी १ ते २ या वेळेत, जिल्हाधिकारी कार्यालयात राबविण्यात येणार आहे, अशी माहिती सामान्य प्रशासन विभागाचे उपजिल्हाधिकारी रवींद्र मठपती यांनी दिली. संबंधित विभागाने तयारी करावी, असे आवाहन करण्यात आले आहे.
---
मालवणात
२० ला सभा
मालवण ः येथील नागरी सहकारी पतसंस्थेची २५ वी वार्षिक सर्वसाधारण सभा २० ऑगस्टला सकाळी साडेदहाला भंडारी हायस्कूल येथे आयोजित केली आहे. संस्थेचे अध्यक्ष विद्याधर केनवडेकर यांच्या अध्यक्षतेखाली ही सभा होणार आहे. तरी सर्व सभासदांनी उपस्थित राहावे, असे आवाहन संस्थेने केले आहे.