७ (पान ६ साठी)

काताळेत बलिदान शिलाफलकाचे अनावरण

गुहागर, ता. १२ ः स्वातंत्र्याचा अमृत महोत्सव या कार्यक्रमाच्या समारोपीय उपक्रमांतर्गत केंद्र शासनाच्या मार्गदर्शक सूचनेप्रमाणे, काताळे ग्रामपंचायतीने ११ ऑगस्टला विविध उपक्रमांचे आयोजन केले होते. काताळे ग्रामपंचायत कार्यालय येथे सकाळी ९ वाजात सरपंच प्रियांका सुर्वे यांच्या हस्ते शूरवीरांची, स्वातंत्र्यसैनिकांची, भारतमातेची वेशभूषा धारण केलेल्या विद्यार्थ्यांच्या साक्षीने ध्वजारोहण झाले. यानंतर काताळे बारस्करवाडी स्टॉप येथून प्रभातफेरीने उपस्थित सर्वजण नियोजित ग्रामपंचायत इमारतीच्या जागेठिकाणी शालेय मुलांच्या बँड पथकाच्या गजरात पोहोचले. या स्थळी पोहोचल्यानंतर सरपंच सुर्वे, उपसरपंच प्रसाद सुर्वे यांच्या हस्ते मातृभूमीच्या स्वातंत्र्याकरिता तिच्या गौरवाकरिता, रक्षणाकरिता बलिदान दिलेल्या वीरांना नमन करण्याच्या पवित्र उद्देशाने उभारण्यात आलेल्या शिलाफलकाचे अनावरण करण्यात आले. उपस्थित सर्वांनी प्रज्वलित दीप हातात घेऊन पंचप्राण शपथ घेतली आणि येथील पवित्र माती संकलित केली. या वेळी कातळे शाळा नं. १ येथील विद्यार्थ्यांनी सुस्वर देशभक्तीपर समूहगीत सादर केले. या वेळी ग्रामविकास अधिकारी महेंद्र निमकर, लिपिक अमोल सुर्वे, शिपाई दीपक बारस्कर, डाटा ऑपरेटर सोनाली पंडित, भाजप तालुकाध्यक्ष नीलेश सुर्वे, ग्रामपंचायत सदस्य मधुकर अजगोलकर, पोलिस पाटील सचिन रसाळ, तंटामुक्ती अध्यक्ष शंकर येद्रे, माजी उपसरपंच आशीर्वाद बारस्कर, प्रभाग संघ सचिव सुनिधी मोहिते, कृषिसखी स्मिता शिरधनकर, सीआरपी दीक्षा पवार, अंगणवाडी सेविका छाया सुर्वे आदी उपस्थित होते.