26938
सावंतवाडी ः येथील मोती तलावात मानाचा नारळ अर्पण करताना पोलिस निरीक्षक ऋषिकेश अधिकारी. शेजारी राजेसाहेब खेमसावंत भोसले, युवराज लखमराजे भोसले, श्रद्धाराजे भोसले आदी.

सावंतवाडीत नारळी पौर्णिमा जल्लोषात

मोती तलावात नारळ अर्पण; पारंपरिक सोहळ्यास नागरिकांची गर्दी

सकाळ वृत्तसेवा
सावंतवाडी, ता. ३० ः नारळी पौर्णिमेनिमित्त दरवर्षीप्रमाणे येथील संस्थानकालीन मोती तलावात सावंतवाडीकरांकडून नारळ अर्पण करत नारळी पौर्णिमा मोठ्या उत्साहात साजरी करण्यात आली. सावंतवाडी संस्थानचे राजेसाहेब खेमसावंत भोसले व पोलिस निरीक्षक ऋषिकेश अधिकारी यांच्या हस्ते मानाच्या सुवर्ण नारळाचे पूजन करण्यात आले. त्यानंतर मोती तलावात मानाचा नारळ अर्पण करण्यात आला.
सावंतवाडी पोलिसांकडून मानाच्या श्रीफळाची शहरातून मिरवणूक काढण्यात आली. ही मिरवणूक वाजतगाजत मोती तलाव काठावर आली‌. सावंतवाडी संस्थानच्या व मानाच्या नारळाची पूजा राजेसाहेब खेमसावंत भोसले व पोलिस निरीक्षक ऋषिकेश अधिकारी यांच्या हस्ते करण्यात आली‌. त्यानंतर प्रतिकात्मक सोन्याचा नारळ मोती तलावात अर्पण करण्यात आला. यानंतर उपस्थित सावंतवाडीकरांनी नारळ अर्पण केले. यावेळी मोती तलावाभोवती मोठी गर्दी पाहायला मिळाली. शालेय शिक्षणमंत्री दीपक केसरकर यांच्यावतीनेही तलावात नारळ अर्पण करण्यात आला.
यावेळी सावंतवाडी संस्थानचे राजे खेमसावंत भोसले, युवराज लखमराजे भोसले, युवराज्ञी श्रद्धाराजे भोसले, पोलिस निरीक्षक ऋषिकेश अधिकारी, राष्ट्रवादीच्या कोकण विभाग महिला अध्यक्षा अर्चना परब, पूजा दळवी, माजी नगरसेवक सुरेंद्र बांदेकर, दिलीप भालेकर, श्री. पोतनीस, सोमण गुरुजी आदी उपस्थित होते.