33274
बांदा ः येथे घरगुती गणेशमूर्तींचे विसर्जन करण्यात आले.
33275
निगुडे ः येथे घरगुती गणपतींना निरोप देताना भाविक. (छायाचित्रे ः नीलेश मोरजकर)

गणपती बाप्पा मोरया, पुढच्या वर्षी लवकर या!

बांद्यात रंगला विसर्जन सोहळा ः पाचव्या दिवशी १००४ बाप्पांना निरोप

सकाळ वृत्तसेवा
बांदा, ता. २४ ः वाजतगाजत आलेल्या लाडक्या बाप्पांना पाच दिवस पूर्ण होताच शनिवारी (ता. २३) भावपूर्ण वातावरणात निरोप देण्यात आला. शहर व परिसरात १००४ घरगुती गणपतींचे तेरेखोल नदीपात्रात विसर्जन करण्यात आले.
‘गणपती बाप्पा मोरयाऽऽ पुढच्या वर्षी लवकर याऽऽ’, ‘गणपती चालले गावाला, चैन पडेना आम्हाला’, ‘एक दोन तीन चार, गणपतीचा जयजयकार’ आदी जयघोषासह बांदा शहर व ग्रामीण भागात पाच दिवसांच्या गणपती बाप्पाला भावपूर्ण निरोप देण्यात आला. सावंतवाडी तालुक्यासह जिल्ह्यात मंगळवारी (ता. १९) गणरायांचे मोठ्या उत्साहात घरोघरी आगमन झाले होते. शहरात आळवाडी, निमजगा, सटमटवाडी, पानवळ, गडगेवाडी, तुळसान पूल, रामनगर येथे तेरेखोल नदी, ओहोळात विसर्जन करण्यात आले. बांदा सहायक पोलिस निरीक्षक शामराव काळे, उपनिरीक्षक समीर भोसले यांच्या मार्गदर्शनाखाली शहरात ठिकठिकाणी बंदोबस्त तैनात होता. विसर्जनस्थळी ग्रामपंचायत प्रशासनाने प्रकाशझोताची व्यवस्था केली होती.
..............
चौकट
गणपती बाप्पांवर फुलांचा वर्षाव
बांदा-आळवाडी येथे तेरेखोल नदीपात्रात मोठ्या संख्येने गणपती बाप्पांचे विसर्जन करण्यात येते. या ठिकाणी येणाऱ्या प्रत्येक गणेशमूर्तीवर तोफेच्या माध्यमातून फुलांचा वर्षाव करण्यात येत होता. अचानक होत असलेल्या फुलांच्या वर्षावामुळे भाविक देखील सुखावले. पाऊस असल्याने नदीपात्रात गणपती विसर्जनासाठी होडीची व्यवस्था करण्यात आली होती.