१० (टूडे २ साठी)

बहुजन मुक्ती पार्टीचे आज रत्नागिरीत अधिवेशन
सकाळ वृत्तसेवा
जाकादेवी, ता. ६ ः रत्नागिरी जिल्हा बहुजन मुक्ती पार्टीतर्फे जिल्हास्तरीय अधिवेशन शनिवारी (ता. ७) सकाळी ११ ते ४ या कालावधीत आयोजित केले आहे. हे अधिवेशन भारतरत्न डॉ. बाबासाहेब आंबेडकर वसतिगृह शिवाजीनगर, रत्नागिरी येथे होणार आहे.
जिल्हास्तरीय अधिवेशनाचे उद्घाटन शांतता समिती रत्नागिरी जिल्हा कमिटीचे युयुत्सु आर्ते यांच्या हस्ते होणार आहे. या वेळी प्रमुख मार्गदर्शक म्हणून राष्ट्रवादी काँग्रेस पार्टीचे प्रदेश उपाध्यक्ष कुमार शेट्ये, शिवसेना आमदार राजन साळवी, शिवसेना जिल्हा संपर्कप्रमुख राजेंद्र महाडिक,संभाजी ब्रिगेड रत्नागिरी जिल्ह्याचे अध्यक्ष मिथिलेश देसाई, विधानसभा अध्यक्ष प्रमोद शेरे ,वंचित बहुजन आघाडी रत्नागिरी जिल्ह्याचे उपाध्यक्ष काका जोशी यांचे प्रमुख मार्गदर्शन लाभणार आहे. हा कार्यक्रम महाराष्ट्र प्रदेशाचे राज्य संघटक सागर सुतार यांच्या अध्यक्षतेखाली होणार आहे. या वेळी जिल्ह्यातील अनेक मान्यवर मंडळी तसेच बहुजन मुक्ती पार्टीचे पदाधिकारी उपस्थित राहणार आहेत. भारतात लोकशाही जिवंत ठेवायचे असेल तर देशातील निवडणूक मुक्त निपक्ष झाल्या पाहिजेत, शेती व शेतकरी विरोधी धोरणामुळे आज शेतकऱ्यांच्या हजारो समस्या निर्माण झाल्या आहेत. त्यामुळे लाखो शेतकरी आत्महत्या करीत आहेत. अशा अनेक ज्वलंत विषयांवर जनजागृती व आंदोलनाची दिशा ठरविण्यासाठी बहुजन मुक्ती पार्टी जिल्हास्तरीय अधिवेशन आयोजित करण्यात आले आहे. बहुजन समाजातील नागरिकांनी विचारवंतांनी या जिल्हास्तरीय अधिवेशनामध्ये सहभाग घ्यावा, असे आवाहन बहुजन मुक्ती पार्टी रत्नागिरीचे जिल्हाध्यक्ष बाळा कचरे यांनी केले आहे.