३७२२८

व्यसनमुक्ती उखाणे स्पर्धेत
शीतल तेंडोलकर विजेत्या
सकाळ वृत्तसेवा
कुडाळ, ता. ११ ः व्यसनमुक्ती सप्ताहनिमित्त व लालबहादूर शास्त्री, महात्मा गांधी जयंतीचे औचित्य साधून नशाबंदी मंडळ सिंधुदुर्ग, जिल्हा समाज कल्याण विभाग व नगरपंचायत कुडाळ यांच्या संयुक्त विद्यमाने व्यसनमुक्तीच्या प्रचार, प्रसार व प्रबोधनासाठी महिला मेळाव्याचे आयोजन करण्यात आले. या मेळाव्यात महिलांसाठी आयोजित व्यसनमुक्ती उखाणे स्पर्धेस उत्स्फूर्त प्रतिसाद मिळाला. स्पर्धेत पंधरा महिलांनी सहभाग नोंदविला. यात अनुक्रमे शीतल तेंडोलकर, साधना पालव, स्नेहा राऊळ यांनी प्रथम तीन क्रमांक पटकावले. स्पर्धेतील विजेत्या महिलांना आकर्षक बक्षीस व महामानवांची व्यसनमुक्ती विचार पुस्तिका भेट देऊन सन्मानित करण्यात आले. यावेळी पोस्टर प्रदर्शनाच्या माध्यमातून महिलांशी संवाद साधताना नशाबंदी मंडळाच्या जिल्हा संघटक अर्पिता मुंबरकर यांनी समाजातील व्यसनाधीनता कमी करण्याच्या कार्यात महिलांनी पुढाकार घ्यावा, असे आवाहन केले. सूत्रसंचालन नगरपंचायत लिपिक गजानन पेडणेकर यांनी केले. आभार प्रशासकीय अधिकारी गीतांजली नाईक यांनी मानले. कार्यक्रमास नगरपंचायत कर्मचाऱ्यांचे सहकार्य मिळाले. सर्वांना व्यसनमुक्तीची शपथ देऊन कार्यक्रमाची सांगता करण्यात आली. कुडाळ नगराध्यक्षा अक्षता खटावकर, उपनगराध्यक्ष किरण शिंदे, सर्व नगरसेवक, मुख्याधिकारी अरविंद नातू यांच्या सहकार्यातून कार्यक्रम पार पडला.