ऑनलाइन व्यवहार करताना
नियम पाळा ः कोल्हटकर

ओरोस येथील कार्यशाळेत आवाहन

कसाल,ता. १३ ः आपण कितीही सुशिक्षित असलो तरी ऑनलाईन व्यवहारांमध्ये अनेक जणांना अडचण येते. त्यामुळे ऑनलाईन व्यवहार करताना काटेकोर नियम पाळा, असे मत सिंधुदुर्ग जिल्हा पोलिस दलातील सहाय्यक पोलिस निरीक्षक मनीष कोल्हटकर यांनी व्यक्त केले.
ओरोस येथील शासकीय वैद्यकीय महाविद्यालयात विद्यार्थी आणि प्राध्यापकांसाठी नुकतीच ‘सायबर क्राईम जनजागृती’ याविषयी मार्गदर्शन कार्यशाळा घेण्यात आली. यावेळी श्री. कोल्हटकर बोलत होते. यावेळी वैद्यकीय महाविद्यालयाचे मेडिसिन विभागाचे डॉ. शेवाळे, डॉ. मनीष धकाटे, डॉ. बनसोडे आदींनी विद्यार्थ्यांना मार्गदर्शन केले. व्याख्यानासाठी महाविद्यालयाचे अधिष्ठाता डॉ. सुनीता रामानंद, शरीर रचना शास्त्र विभागाचे प्रमुख डॉ. जोशी, शास्त्र विभागाचे डॉ. नितीन ढेकणे, जीवशास्त्र विभागाचे डॉ. बरंग, डॉ. कुलकर्णी, डॉ. मंगलकर आदी उपस्थित होते. यावेळी एपीआय कोल्हटकर यांनी विविध विषयावरती मार्गदर्शन केले. सध्या सायबर क्राईम हा मोठा विषय आहे. या सायबर क्राईमच्या जाळ्यामध्ये अनेकजण फसत आहेत. यात सर्वांनी सावध राहण्याची आवश्यकता असल्याचे मत ही त्यांनी यावेळी व्यक्त केले.