विजेच्या धक्क्याने चार गुरांचा मृत्यू

लांजा, ता. १३ ः विजेच्या खांबावरून तुटलेल्या वाहिनीतून विजेचा धक्का लागून रानात चरणाऱ्या चार दुभत्या गुरांचा जागीच मृत्यू झाला. ही घटना शुक्रवारी (ता. १३) केळंबे येथे पहाटे ५.३० वाजण्याच्या सुमारास घडली. यामध्ये मालकाचे सुमारे तीन लाख रुपयांचे नुकसान झाले आहे. तालुक्यातील केळंबे येथील राजाराम लांबोरे यांनी शुक्रवारी पहाटे गुरे लगतच्या जागेत चरायला सोडली होती. त्यावेळी त्यांचा तुटलेल्या वाहनीला स्पर्श झाला व विजेचा धक्का या दोन गाई आणि दोन म्हैशींना बसला. यात त्यांचा जागीच मृत्यू झाला. गुरे ओरडत असल्याने राजाराम लांबोरे त्या ठिकाणी धावत गेले असता गुरांना शॉक लागल्याचे लक्षात आले. दिवसाला सहा लिटर दूध देणाऱ्या दोन दुभत्या म्हैशी, दिवसाला दहा लिटर दूध देणाऱ्या दोन गाईचा मृत्यू झाल्याने लांबोर यांचे तीन लाखांचे नुकसान झाले. महावितरणने याचा पंचनामा केला आहे. महावितरणने नुकसान भरपाई द्यावी, अशी मागणी गुरे मालक राजाराम लांबोरे यांनी केली आहे.