कसालमध्ये घरात घूसून
वृध्देचे दागिने पळवले
सकाळ वृत्तसेवा
ओरोस, ता. १३ ः कसाल येथे घरात घूसून वृध्द महिलेच्या गळ्यातील दागिने खेचून लंपास केल्याचा प्रकार घडला. यात सुमारे पावणे दोन तोळ्याची माळ चोरट्याने पळवली. ही घटना काल (ता.१२) पहाटे ६ च्या सुमारास घडली. याबाबतची तक्रार जानकी रामचंद्र पवार (वय ८५ रा. कसाल, केळुसकरवाडी) यांनी आज सिंधुदुर्गनगरी पोलीस ठाण्यात दाखल केली.
तक्रारीत जानकी पवार यांनी म्हटले आहे की, जानकी या काल सकाळी ६ ते ६.३० वाजण्याच्या सुमारास कसाल- केळुसकरवाडी येथील राहत्या घरातील सकाळी उठून बाथरूममध्ये चेहऱ्यावर पाणी मारून मागील पडवीतून घरातील मागील दरवाजाने परत येत असताना एक अनोळखी व्यक्ती पाठीमागून येऊन गळ्याला पकडून जोंधळी माळ जबरीने खेचून पळून गेला. त्या व्यक्तीने डोक्यापासून ते पायापर्यंत काळसर रंगाचे कपडे परिधान केले होते. तो अंगाने मजबूत व उंच होता. याबाबत सिंधुदुर्गनगरी पोलीस ठाण्यात गुन्हा दाखल करण्यात आला आहे. या घटनेची माहिती मिळाल्यानंतर सावंतवाडी उपविभागीय अधिकारी स्थानिक गुन्हा अन्वेषण पोलीस निरीक्षक संदीप भोसले, सहाय्यक पोलीस निरीक्षक महेंद्र घाग यांच्या पथकासह सिंधुदुर्गनगरी पोलीस ठाण्याचे सहाय्यक पोलीस निरीक्षक मनीष कोल्हटकर, उपनिरीक्षक राजेंद्र दळवी यांनी भेट दिली आहे. श्वान पथक सुद्धा घटनास्थळी दाखल झाले. अधिक तपास सहाय्यक पोलीस निरीक्षक मनीष कोल्हटकर हे करीत आहेत.