विठ्ठलाची २१ फुटी मूर्ती
ठरणार पर्यटकांचे आकर्षण
रत्नागिरी, ता. १५ : शहरातील माळनाका येथील शिर्के गार्डनमध्ये महाराष्ट्राचे आराध्य दैवत श्री विठ्ठलाची २१ फुटी मूर्ती उभारली जाणार आहे. ही मूर्ती धार्मिक आणि पर्यटनदृष्ट्या मोठे आकर्षण ठरणार आहे. यावर १ कोटी २७ लाख रुपये खर्च होणार असून त्याचा चबुतराच ८ फुटाचा असणार आहे.
रत्नागिरी शहराचा सर्वांगीण विकास करण्याच्यादृष्टीने आणि एक मॉडेल सिटी व्हावी यासाठी मंत्री उदय सामंत याचा प्रयत्न आहे. त्यासाठी पायाभूत सविधांसह शैक्षणिक सुविधा, पर्यटनाला चालना देणारे उपक्रम त्यांनी हाती घेतले आहेत. तब्बल १५७ कोटीची विकासकामांची सुरवात १७ तारखेपासून होणार आहे. मुख्य रस्त्याचे काँक्रिटीकरण होणार असल्याने शहरवासीयांना खड्डेमुक्त रस्ते भविष्यात मिळणार आहेत. सुमारे ९६ कोटीचे हे काम आहे. रस्त्याच्याकडेला काँक्रिट पाईप बसवण्यात येणार आहेत. त्यावर हेवी पेवरब्लॉक टाकण्यात येणार आहेत. या पाईपमधून भविष्यात विद्युत, पाणी, गॅस आधी पाइपलाइन जाणार आहेत. रस्त्याची खोदाई हा विषय यापुढे राहणार नाही. ध्यानकेंद्रासाठी ५ कोटी खर्च केले जाणार आहेत. थिबा पॅलेस येथे खुल्या नाट्यगृहासाठी २० कोटी रुपये दिले जाणार आहेत. पर्यटनाच्यादृष्टीने ते महत्वाचे ठरणार आहे. जिजामाता उद्यानसह खाऊगल्ली विकसित करण्याआधी भरीव निधी देण्यात आला आहे. शहरातील तेलीआळी येथे गार्डन विकसित करण्यात येणार आहे. यासाठी २ कोटी रुपये खर्च केले जाणार आहेत. आठवडा बाजार येथील शॉपिंग सेंटर नव्याने उभारले जाणार आहे. त्यासाठी ३ कोटी ३९ लाख रुपये खर्च होणार आहेत.