३७ (पान २ साठी)

विकसित भारत यात्रेच्या रथ आज रत्नागिरीत

रत्नागिरी, ता. २६ : भारत सरकारने विकसित भारत संकल्प यात्रा या नावाची देशव्यापी मोहीम १५ नोव्हेंबर ते २६ जानेवारी २०२४ या कालावधीमध्ये सुरू केली आहे. ही यात्रा आता बुधवारी (ता. २७) सकाळी लक्ष्मीचौक आणि दुपारी मारुती मंदिर चौक येथे येणार आहे.
भारत सरकारच्या फ्लॅगशिप योजनांचे लाभ लाभार्थ्यांपर्यंत वेळेत पोहोचण्याच्या उद्देशाने विकसित भारत संकल्प यात्रा ही मोहिम आखण्यात आली आहे. या मोहिमेमध्ये विविध योजनांतर्गत पात्र असलेल्या परंतु आता पर्यंत लाभ न घेतलेल्या लोकांपर्यंत प्रसार आणि योजनांबद्दल जागरूकता निर्माण करणे, सरकारी योजनांचा लाभ घेतलेल्या लाभार्थ्यांशी संवाद साधणे, या मोहिमेदरम्यान संभाव्य लाभार्थ्यांची नोंदणी करणे आदी उद्दिष्टे साध्य करावयाची आहेत.
या विकसित भारत संकल्प यात्रेमध्ये शहरी भागात केंद्र शासनाच्या विविध विभागाकडील पीएम स्वनिधी योजना, पीएम आवास योजना, पीएम उज्ज्वला योजना, पीएम स्वच्छ भारत अभियान (शहरी) योजना, आयुष्यमान भारत योजना, पीएम सुरक्षा बीमा योजना, मुद्रा लोन, डिजीटल पेमेंट इन्फ्रास्ट्रक्चर या शासनाच्या विविध योजनांची माहिती जनतेपर्यंत पोहोचविण्याचे काम या माध्यामातून केले जाणार आहे.
सकाळी ११ ते १ लक्ष्मीचौक, गाडीतळ व दुपारी ३ ते ५ या वेळेत मारुती मंदिर चौक येथे या विकसित भारत संकल्प यात्रेच्या अभियानाचे रथाचे आगमन होणार आहे. या अभियान यात्रेच्या माध्यमातून नागरिकांना केंद्र शासन, नगरविकास विभाग व इतर विभागातील विविध योजनांची माहिती देण्यात येणार आहे. या योजना लोकांपर्यत पोहोचाव्या आणि योजनेचा प्रसार व प्रचार व्हावा व नागरिकांमध्ये जागरूकता निर्माण व्हावी हा मुख्य उद्देश या अभियानाचा राहणार असल्याचे पालिकेतर्फे सांगण्यात आले. नागरिकांनी व लाभार्थ्यांनी मोठया संख्येने अभियानात सहभागी होऊन योजनेचा लाभ घ्यावा, असे आवाहन केले आहे.